शिवछत्रपती विद्यानिकेतन, पानवण व आदर्श प्री-स्कूल, पानवण येथे आषाढी वारी निमित्त भक्तिमय दिंडी उत्साहात
पानवण, ता. माण (प्रतिनिधी) : आदर्श गुरुकुल सामाजिक, शैक्षणिक व क्रीडा संस्था, पानवण संचलित शिवछत्रपती विद्यानिकेतन, पानवण व आदर्श प्री-स्कूल, पानवण यांच्या वतीने आषाढी एकादशीनिमित्त विद्यार्थ्यांची भव्य दिंडी उत्साहात पार पडली.
वारकरी परंपरेचा वारसा जपत विद्यार्थ्यांनी पारंपरिक वारकरी वेशभूषा परिधान करून टाळ-मृदंगाच्या गजरात, भगवे ध्वज, तुळशी वृंदावन आणि विठ्ठल-रुक्मिणी यांच्या प्रतिमा घेऊन गावातून दिंडी काढली. “ज्ञानोबा-तुकाराम”, “पांडुरंग हरी”, “राम कृष्ण हरी” या जयघोषांनी संपूर्ण परिसर भक्तिमय झाला.दिंडीदरम्यान विद्यार्थ्यांनी संतांच्या अभंगांचे सादरीकरण केले. या उपक्रमातून विद्यार्थ्यांमध्ये भक्ती, संस्कार, शिस्त, सामाजिक ऐक्य तसेच महाराष्ट्राच्या समृद्ध वारकरी परंपरेविषयी आदर निर्माण करण्याचा संदेश देण्यात आला.
या प्रसंगी संस्थेचे संस्थापक अध्यक्ष श्री. नामदेव शिंदे, सचिव श्री. उत्तम जाधव, संचालक सौ. स्नेहल जाधव, मुख्याध्यापक श्री. वैभव काशिद व सौ. लक्ष्मी काशिद, मंगल काळेल उपस्थित होते. तसेच शिक्षक, शिक्षकेतर कर्मचारी, पालक आणि ग्रामस्थांनी मोठ्या संख्येने सहभाग घेत विद्यार्थ्यांचे उत्साहवर्धन केले. ग्रामस्थांनी विद्यार्थ्यांवर पुष्पवृष्टी करून दिंडीचे स्वागत केले. संपूर्ण कार्यक्रम अत्यंत शिस्तबद्ध, भक्तिमय व उत्साहपूर्ण वातावरणात संपन्न झाला.
