हनुमान विकास सोसायटीच्या कर्जमाफी प्रकरणाची चौकशी करून सचिवावर कारवाईची सहाय्यक निबंधक यांच्याकडे .युवा नेते हणमंत मोटे यांची मागणी
आटपाडी | प्रतिनिधी
विभूतवाडी येथील हनुमान विकास सोसायटीच्या कर्जमाफी लाभार्थी यादीत कथित अनियमितता झाल्याचा आरोप करत या संपूर्ण प्रकरणाची सखोल चौकशी करून संबंधित सचिवावर कठोर कारवाई करण्यात यावी, अशी मागणी हनमंत मोटे यांनी सहाय्यक निबंधक, सहकारी संस्था, आटपाडी यांच्याकडे लेखी निवेदनाद्वारे केली आहे.
निवेदनात म्हटले आहे की, प्रसिद्ध झालेल्या कर्जमाफी लाभार्थी यादीत जमीन नसलेल्या सोसायटीच्या सचिवांचे नाव असल्याने लाभार्थी निवडीच्या प्रक्रियेबाबत संशय निर्माण झाला आहे.
संबंधित प्रकरणात नियमांचे पालन झाले का, लाभार्थ्यांची पात्रता योग्यरीत्या तपासण्यात आली होती का, याची निष्पक्ष चौकशी करून सत्य जनतेसमोर आणावे, अशी मागणी करण्यात आली आहे.तसेच, संबंधित सचिव पात्र शेतकऱ्यांना पीककर्ज मंजूर करण्यासाठी अनावश्यक टाळाटाळ करत असल्याच्या तक्रारीही निवेदनात नमूद करण्यात आल्या आहेत.
त्यामुळे अनेक पात्र शेतकऱ्यांना वेळेवर कर्ज मिळत नसून आर्थिक फटका बसत असल्याचा आरोप करण्यात आला आहे. सचिव नियमितपणे कार्यालयात उपस्थित राहत नसल्याने सोसायटीचे दैनंदिन कामकाज विस्कळीत होत असून सभासदांना वारंवार हेलपाटे मारावे लागत असल्याचेही निवेदनात म्हटले आहे.
या सर्व बाबींची निष्पक्ष चौकशी करून दोषी आढळणाऱ्यांवर कठोर प्रशासकीय कारवाई करण्यात यावी, अशी मागणी हनुमंत मोटे यांनी केली असून या निवेदनामुळे विभूतवाडी परिसरातील सहकारी संस्थांच्या कामकाजाबाबत पुन्हा एकदा चर्चा सुरू झाली आहे.
