बैलगाडा शर्यतींवरील बंदी उठवणयासाठी खासदार डॉ. अमोल कोल्हे आक्रमक भुमिकेत !!
जगदीश का. काशिकर,
कायदा (लॉ) / नाेकरी (जाॅब) सल्लागार (कन्सलन्टंट) व मुक्त पत्रकार*, महाराष्ट, व्हाटसअप – ९७६८४२५७५७
पुणे: बैलगाडा शर्यत सुरू व्हावी ही प्रत्येकाची इच्छा असून त्याबाबत दिलेल्या आश्वासनाच्या पूर्तीसाठी आपण वेळोवेळी पाठपुरावा करत आहोत.
बैल हा पाळीव प्राणी संरक्षित प्राण्यांच्या यादीतून वगळण्याबाबतचा विषय न्यायप्रविष्ठ असून पाच सदस्यीय खंडपीठासमोर प्रलंबित आहे.
केंद्र सरकारच्या माध्यमातून बैलगाडा शर्यतीवरील निर्बंध उठवण्यासाठी आपण आजी व माजी केंद्रीय पशुसंवर्धन मंत्री गिरीराजसिंह व पुरूषोत्तम रुपाला यांच्यासोबत स्वतंत्र चर्चा केली असून लवकरच या विषयी दोघांसमवेत बैठक करून संयुक्त चर्चा करणार आहे. संरक्षित प्राण्यांच्या यादीतून बैल या प्राण्यास वगळले, तर बैलगाडा शर्यत सुरू होण्याचा मार्ग सोपा होईल.
या विषयी चर्चा करण्यासाठी आपण पंतप्रधान नरेंद्र मोदी यांचीदेखील वेळ मागितली आहे, असे शिरूर लोकसभा मतदार संघाचे खासदार डॉ. अमोल कोल्हेसाहेब यांनी ओझर ( ता. जुन्नर ) येथे झालेल्या आखिल भारतीय बैलगाडा मालकांच्या बैठकीत सांगितले.
खासदार डॉ. कोल्हेसाहेब म्हणाले राजकीय मतभेद विसरून आजी माजी लोकप्रतिनिधींना बरोबर घेऊन बैलगाडा शर्यतींवरील बंदी उठवून हा प्रश्न मार्गी लावण्याचा आपण प्रामाणिक प्रयत्न करत आहोत.
येत्या आठवडयात याबाबत राष्ट्रवादी काँग्रेसचे प्रदेशाध्यक्ष तथा जलसंपदा मंत्री जयंत पाटीलसाहेब यांच्याशी बैठक होणार आहे. योग्य दिशेने पाठपुरावा करून त्यात निश्चितपणे यश मिळेल, असा विश्वास त्यांनी व्यक्त केला.
या गोष्टीला वेळ लागणार असल्याने तोपर्यंत संयम बाळगण्याचे आवाहन त्यांनी उपस्थित बैलगाडा शौकिनांना केले.
प्रयत्न करूनही यश प्राप्त न झाल्यास आंदोलन हा शेवटचा पर्याय असेल. त्याची धग दिल्लीपर्यंत जाईल व त्या कामी मी अग्रस्थानी असेल.
एका व्यक्तीच्या राजकीय कारकीर्दीची आत्महत्या करून हा प्रश्न सुटणार असेल, तर त्यासाठी मी तयार असल्याचेही खासदार डॉ. कोल्हेसाहेब यांनी सांगितले. बैलगाडा शर्यत २०१४पासून बंद झाल्यामुळे जातीवंत बैलांच्या व गाईंच्या संख्येत दिवसेंदिवस घट होत आहे. शेतकरी गोवंशाचे जतन व रक्षणासाठी अटोकाट प्रयत्न करत असून बैलगाडा शर्यत बंदीमुळे खिलार व देशी जातीच्या जनावरांचे आस्तित्व धोक्यात आले असल्याचे शेतकऱ्यांनी सांगितले.
