पुणे जिल्ह्यातील कोरोना परिस्थिती व उपाययोजनांबाबत आज उपमुख्यमंत्री अजितदादा पवार यांच्या अध्यक्षतेखाली पुण्यात आढावा बैठक संपन्न झाली !!
जगदीश का. काशिकर,
कायदा (लॉ) / नाेकरी (जाॅब) सल्लागार (कन्सलन्टंट) व मुक्त पत्रकार*, महाराष्ट, व्हाटसअप – ९७६८४२५७५७
पुणे: महानगरपालिकेच्या वतीनं करण्यात येत असलेल्या उपाययोजनांबाबत तसंच ग्रामीण भागातील कोरोना रुग्ण स्थितीबाबत व उपाययोजनांबाबत यावेळी अजितदादांनी माहिती घेतली.
जिल्ह्यात कोविड प्रतिबंधक लसीकरणाचा ७० लाखांचा टप्पा पार झाला आहे. ग्रामीण भागात धडक सर्वेक्षण मोहिमेंतर्गत २ लाख ८३ हजार ३२७ नमुना तपासणी करण्यात आली आहे. ग्रामीण कार्यक्षेत्रातील हॉटस्पॉट गावांत कोविड योग्य वर्तन जनजागृती, शोध चाचणी उपचार, कोविड केअर सेंटर, शासकीय योजना व कोविड लसीकरण या पाच कृतीदलाच्या माध्यमातून कोविडमुक्त गाव अभियानास सुरुवात करण्यात आली आहे. जिल्ह्यात मागील चार आठवड्यांमध्ये रुग्णसंख्या कमी होताना दिसून येत आहे. कोरोनाच्या संभाव्य तिसऱ्या लाटेला तोंड देण्यासाठी प्रशासन तयारी करत असून नागरिकांनीही नियमांचं पालन करावं. पुणे मनपामध्ये १०, पिंपरी चिंचवडमध्ये ३, पुणे ग्रामीणमध्ये १२ ऑक्सिजन प्लांट कार्यान्वित झाले आहेत. संभाव्य तिसऱ्या लाटेच्या अनुषंगानं अपेक्षित ऑक्सिजनची गरज लक्षात घेता जिल्हा ऑक्सिजनबाबत स्वयंपूर्ण करण्यात येत आहे. जिल्ह्यात पहिल्या डोस आधी दुसऱ्या डोसला प्राधान्य देण्यात येत आहे. खाजगी रुग्णालय लसीकरणावरही शासनाचं नियंत्रण आहे. तसंच खाजगी रुग्णालयाच्या वैद्यकीय देयकांचे लेखा परिक्षणही वेळोवेळी सुरु आहे. रुग्णसंख्या कमी होत असली तरी चाचण्यांचे प्रमाण कमी केलेले नाही. सुपर स्प्रेडर सर्वेक्षण नमुना तपासणीमध्ये एम.आय.डी.सी. कारखाने क्षेत्रातील कामगार व मजूर, बँक कर्मचारी तसंच सामाजिक पदाधिकारी व कार्यकर्ते यांची आरटीपीसीआर नमुना तपासणी करण्यात येत आहे. धडक सर्वेक्षण मोहिमेमुळे हॉटस्पॉट गावांची संख्या १०९ वरुन ९५ पर्यंत कमी झाली आहे. ग्रामीण भागातील हॉटस्पॉट गावांवरही विशेष लक्ष देण्यात येत आहे. शाळा सुरु करण्याबाबत टास्क फोर्सचे तज्ञ जे मार्गदर्शन देतील त्यानुसारच निर्णय घेण्यात येईल असे अजितदादांनी स्पष्ट केले.
यावेळी खा. सुप्रियाताई सुळे, गृहमंत्री दिलीप वळसे पाटील साहेब, विधानपरिषद उपसभापती नीलमताई गोऱ्हे, सर्व आमदार शासकीय अधिकारी उपस्थित होते.
