भडगाव:- नाशिक जिल्ह्यातील सटाणा तालुक्यातील खमताने येथे एका ९ वर्षीय नाभिक समाजातील बालिकेवर ७० वर्षीय नराधमाने केलेल्या लैंगिक अत्याचाराच्या घृणास्पद घटनेचा येथील श्री संत सेना महाराज नाभिक समाज विकास मंडळाने तीव्र निषेध केला आहे. या नराधमाला कठोर शिक्षा व्हावी आणि पीडित कुटुंबाला न्याय मिळावा, यासाठी समाजाने भडगाव येथील तहसीलदार आणि पोलीस निरीक्षक यांना निवेदन दिले. यासोबतच, आमदार जयंत पाटील यांनी नाभिक समाजाबाबत केलेल्या जातिवाचक शब्दाच्या उल्लेखाचा देखील निवेदनातून निषेध करण्यात आला आहे. यावेळी भडगाव शहरातील नाभिक समाज बाधव सह कजगाव, कोठली, गोडगाव, गुढे, अजनविहीरे येथूनही मोठ्या संख्येने समाजबांधव निषेध व्यक्त करण्यासाठी उपस्थित होते.
