वाघाच्या अस्तित्वाचे जंगलाच्या संतुलनात मोठे स्थान – रामदास घावटे चितळीतील नवमहाराष्ट्र विद्यालयात आंतरराष्ट्रीय व्याघ्र दिन,गुरुपौर्णिमा उत्साहात!
मायणी :- प्रतिनिधी
” वाघ हा जंगलातील सर्वोच्च भक्षक असल्याने त्याच्या अस्तित्वाला जंगलाच्या संतुलनात मोठे स्थान आहे. वाघांचे संरक्षण म्हणजे केवळ एका प्राण्याचा नव्हे, तर संपूर्ण परिसंस्थेचे आणि जलस्रोतांचे संरक्षण होय.” अशी माहिती मायणी वनविभागाचे वनपाल रामदास घावटे यांनी नवमहाराष्ट्र विद्यालय ,चितळी.खटाव येथे आयोजित आंतरराष्ट्रीय व्याघ्र दिन व गुरुपौर्णिमेनिमित्त याविविध शैक्षणिक व जनजागृतीपर उपक्रमात ते बोलत होते. त्यांनी सातारा जिल्ह्यातील सह्याद्री व्याघ्र प्रकल्पाचे महत्त्व अधोरेखित करीत विद्यार्थ्यांना पर्यावरण आणि वन्यजीव रक्षणाचा मोलाचा संदेश दिला.
यावेळी वनाधिकारी अनिल देशमुख, स्नेहल शिंगाडे, प्रतिमा मोहिते, निखिल कदम, मुख्याध्यापक हांगे,पाटील सर, सौ. हांगे, जाधव सर श्रीमती धोंगडे, सौ.कोळी मॅडम,कोळेकर सर,श्रीमती धेंडे, सौ.निकम मॅडम. यांची उपस्थिती होती
विद्यालयाचे मुख्याध्यापक हांगे सर यांनी विद्यार्थ्यांना गुरुपौर्णिमेनिमित मार्गदर्शन करताना सांगितले की, “गुरू केवळ पुस्तकी ज्ञान देत नाहीत, तर विद्यार्थ्याला योग्य-अयोग्याची जाणीव करून देऊन त्याचे जीवन उजळून टाकतात. विद्यार्थ्यांनी आपल्या गुरूंचा आदर राखून प्रामाणिकपणे प्रगती केली पाहिजे.”
या कार्यक्रमाच्या निमित्ताने इयत्ता पाचवी ते दहावीच्या विद्यार्थ्यांनी आपल्या मनोगतातून भारतीय संस्कृतीमधील गुरू-शिष्य परंपरेचे महत्त्व अधोरेखित केले. आई-वडिलांनंतर विद्यार्थ्यांच्या जीवनाला योग्य दिशा देणारा शिक्षक हाच खरा मार्गदर्शक असतो, अशा भावना यावेळी व्यक्त करण्यात आल्या.
कार्यक्रमाचे सूत्रसंचालन श्रीमती व्ही. एस. गोसावी यांनी तर आभार सौ. माळवे यांनी मानले.
