:शेतकऱ्याला कर्जमाफी नाही, अन् जमीन नसणाऱ्या साचीवला कर्ज माफी कशी काय चौकशीची मागणी– दोषींवर कठोर कारवाई करावी : भाजप नेते एम. एल. खरजे
आटपाडी तालुक्यातील एका विकास सोसायटीने स्वतःच्या कार्यक्षेत्राबाहेरील तसेच स्वतःच्या नावावर शेती नसलेल्या सचिवालाच पीक कर्ज मंजूर केल्याचा गंभीर प्रकार समोर आल्याचा आरोप करण्यात आला आहे.
विशेष म्हणजे या कर्जाची नंतर कर्जमाफीही झाल्याने संपूर्ण व्यवहाराबाबत संशय व्यक्त होत असून निष्पक्ष चौकशी करून दोषींवर कठोर कारवाई करावी, अशी मागणी भाजप नेते एम. एल. खरजे यांनी केली आहे.
खरजे यांनी म्हटले आहे की, पीक कर्ज योजना ही प्रत्यक्ष शेतकऱ्यांसाठी असून अनेक पात्र शेतकरी आजही कर्जासाठी वणवण फिरत आहेत. मात्र जमीन नसलेल्या व्यक्तीच्या नावावर कर्ज मंजूर होणे आणि त्याला कर्जमाफीचा लाभ मिळणे हा गंभीर प्रशासकीय व आर्थिक गैरप्रकार असल्याचा आरोप त्यांनी केला.
या प्रकरणात संबंधित विकास सोसायटीच्या कामकाजाची, कर्ज मंजुरीची कागदपत्रे, सातबारा उतारे, कर्जमाफीची प्रक्रिया तसेच संबंधित अधिकारी व सचिव यांच्या भूमिकेची सखोल चौकशी करण्याची मागणी करण्यात आली आहे.
जर आरोपांमध्ये तथ्य आढळले तर शासनाची फसवणूक करणाऱ्यांविरुद्ध फौजदारी गुन्हे दाखल करून वसुलीची कारवाई करावी, असेही खरजे यांनी म्हटले आहे.
दरम्यान, या आरोपांमुळे विकास सोसायट्यांमधील कर्जवाटप प्रक्रियेच्या पारदर्शकतेवर प्रश्नचिन्ह निर्माण झाले असून, संपूर्ण प्रकरणाची उच्चस्तरीय चौकशी करून सत्य जनतेसमोर आणावे, अशी मागणी शेतकरी व नागरिकांकडूनही होत आहे.
