डाळिंबाला विक्रमी दर; आटपाडी बाजार समितीत भगवा डाळिंबाला १३२ रुपये प्रतिकिलोचा भाव
केसरी वृत्तसेवा | आटपाडी
आटपाडी कृषी उत्पन्न बाजार समितीच्या मुख्य बाजार आवारातील आधुनिक डाळिंब पणन संकुलात शुक्रवारी (दि. ३१ जुलै) डाळिंबाची मोठ्या प्रमाणात आवक झाली. यावेळी उत्कृष्ट प्रतीच्या भगवा डाळिंबाला प्रतिकिलो १३२ रुपयांचा विक्रमी कमाल दर मिळाल्याने डाळिंब उत्पादक शेतकऱ्यांमध्ये समाधानाचे वातावरण निर्माण झाले आहे.
बाजार समितीने शेतकरी व व्यापाऱ्यांसाठी अत्याधुनिक सुविधा उपलब्ध करून दिल्या आहेत. सीसीटीव्ही, स्वच्छ व दर्जेदार पॅकिंग व्यवस्था, आरओ पिण्याचे पाणी, स्वच्छतागृह, हायमास्ट दिवे तसेच वाहतूक व व्यापारासाठी आवश्यक सुविधा उपलब्ध असल्याने राज्यासह परराज्यातील व्यापारीही येथे मोठ्या प्रमाणात खरेदीसाठी येत आहेत.
शुक्रवारी झालेल्या लिलावात भगवा डाळिंबाची ३०० टन आवक झाली. भगवा डाळिंबाला किमान २० रुपये तर कमाल १३२ रुपये प्रतिकिलो दर मिळाला. तसेच इतर जातीच्या डाळिंबाची १ टन आवक झाली असून त्याला किमान २० रुपये व कमाल ५८ रुपये प्रतिकिलो दर मिळाला.
आटपाडी, खानापूर, जत, सांगोला, माण, खटाव, पंढरपूर, माळशिरस, इंदापूर तसेच अहमदनगर जिल्ह्यासह कर्नाटक राज्यातील शेतकरी आपला माल विक्रीसाठी आटपाडी बाजार समितीत आणत आहेत. त्यामुळे परिसरातील डाळिंब उत्पादकांसाठी ही बाजारपेठ विश्वासार्ह ठरत असल्याचे बाजार समितीने प्रसिद्धीपत्रकाद्वारे सांगितले आहे.
बाजार समितीचे सभापती संतोष पुजारी यांनी शेतकऱ्यांना अधिकाधिक सुविधा उपलब्ध करून देण्यासाठी समिती कटिबद्ध असल्याचे सांगितले.
