१५ ऑगस्टपर्यंत एलपीजी ई-केवायसी अनिवार्य; अन्यथा घरपोच गॅस सिलिंडर मिळणार नाही
आटपाडी……एलपीजी गॅस ग्राहकांसाठी महत्त्वाची सूचना जारी करण्यात आली असून, १५ ऑगस्ट २०२६ पर्यंत ई-केवायसी (e-KYC) पूर्ण करणे अनिवार्य करण्यात आले आहे. भारत गॅस, इंडेन आणि एचपी गॅस या तीनही तेल विपणन कंपन्यांनी आपल्या नोंदणीकृत ग्राहकांना याबाबत एसएमएसद्वारे सूचना पाठविण्यास सुरुवात केली आहे. निर्धारित मुदतीत ई-केवायसी न केल्यास १६ ऑगस्टपासून घरपोच अनुदानित एलपीजी सिलिंडर मिळण्यास अडचणी येऊ शकतात, असा इशारा कंपन्यांनी दिला आहे.
केंद्र सरकारच्या निर्देशानुसार एलपीजी वितरण व्यवस्थेत पारदर्शकता आणणे, बनावट किंवा डुप्लिकेट गॅस जोडण्या रोखणे आणि अनुदानाचा लाभ पात्र ग्राहकांपर्यंतच पोहोचविणे, या उद्देशाने ई-केवायसी मोहीम राबविण्यात येत आहे. त्यामुळे सर्व ग्राहकांनी मुदतीपूर्वी प्रक्रिया पूर्ण करण्याचे आवाहन करण्यात आले आहे.ई-केवायसी कशी करावी?ग्राहकांना आपल्या संबंधित गॅस कंपनीच्या अधिकृत मोबाईल ॲपद्वारे, जवळच्या गॅस एजन्सीमध्ये प्रत्यक्ष जाऊन किंवा गॅस वितरण करणाऱ्या डिलिव्हरी प्रतिनिधीकडूनही ई-केवायसी करता येणार आहे. यासाठी आधार क्रमांक व ओळख पडताळणीची प्रक्रिया पूर्ण करावी लागणार आहे.मुदत चुकल्यास काय?
१५ ऑगस्टनंतर ई-केवायसी न केलेल्या ग्राहकांना घरपोच गॅस सिलिंडर वितरणावर निर्बंध लागू होऊ शकतात. मात्र, अशा ग्राहकांना पुढे कोणत्या दराने किंवा कोणत्या अटींवर सिलिंडर उपलब्ध होईल, याबाबत तेल कंपन्यांनी अद्याप स्पष्ट माहिती दिलेली नाही.ग्राहकांनी काय करावे?१५ ऑगस्टपूर्वी ई-केवायसी पूर्ण करावी.गॅस कंपनीकडून आलेल्या एसएमएसकडे दुर्लक्ष करू नये.
अडचण असल्यास तातडीने आपल्या गॅस एजन्सीशी संपर्क साधावा.ई-केवायसी पूर्ण झाल्याची खात्री करून घ्यावी.गॅस पुरवठ्यात कोणताही अडथळा येऊ नये आणि अनुदानित सिलिंडरचा लाभ कायम राहावा यासाठी सर्व एलपीजी ग्राहकांनी वेळेत ई-केवायसी पूर्ण करण्याचे आवाहन करण्यात आले आहे.
