२६७ रुपयांचा युरिया जादा दराने विक्री; शेतकऱ्यांना कोणी वाली आहे की नाही?जादा दर, लिंकिंग आणि कृत्रिम टंचाईच्या तक्रारी; प्रशासनाच्या कारवाईची मागणी
आटपाडीशासनाने युरियाची अधिकृत किंमत २६७ रुपये प्रति पोते निश्चित केली असताना ग्रामीण भागात काही कृषी सेवा केंद्रांकडून शेतकऱ्यांकडून जादा दर आकारला जात असल्याच्या तक्रारी वाढू लागल्या आहेत. खरीप हंगामात खतांची मोठी गरज असताना शेतकऱ्यांची अडवणूक होत असून, “शेतकऱ्यांना कोणी वाली आहे की नाही?” असा संतप्त सवाल शेतकरी उपस्थित करत आहेत.
अनेक ठिकाणी युरिया देताना इतर औषधे, सूक्ष्म अन्नद्रव्ये किंवा इतर उत्पादने घेण्याची सक्ती (लिंकिंग) केली जात असल्याचीही चर्चा आहे. त्यामुळे आर्थिक अडचणीत असलेल्या शेतकऱ्यांवर अतिरिक्त खर्चाचा बोजा पडत आहे.कृषी विभाग आणि संबंधित प्रशासनाने जादा दराने विक्री करणाऱ्या विक्रेत्यांवर तातडीने धाडी टाकून कारवाई करावी, तसेच अधिकृत दरानेच खत उपलब्ध करून द्यावे,
अशी मागणी शेतकरी संघटनांनी केली आहे.शेतकऱ्यांनीही युरिया खरेदी करताना पक्के बिल घ्यावे, अधिकृत किंमत तपासावी आणि जादा दर आकारल्यास किंवा लिंकिंगची सक्ती केल्यास कृषी विभागाकडे तक्रार नोंदवावी, असे आवाहन करण्यात येत आहे.
खरीप हंगामात खतांचा काळाबाजार आणि जादा दराने विक्री रोखण्यात प्रशासन अपयशी ठरत असल्याची भावना शेतकऱ्यांमध्ये निर्माण झाली असून, दोषींवर कठोर कारवाई करून शेतकऱ्यांना दिलासा द्यावा, अशी मागणी जोर धरू लागली आहे.
