म्हसवड ता.माण येथील माणगंगा नदीपात्रालगत दिवसरात्र वाळुउपसा सुरू असुन हा ठेका कार्वे ता.कराड येथील जनार्धन देसाई यांनी घेतला आहे.
महसुलमंत्री बाळासाहेब थोरात यांच्या नातेसंबंधाचा दबाव आणून हा ठेका चालवला जात असल्याचा आरोप करून हा वाळूउपसा तत्काळ बंद करावा असे तक्रारी निवेदन माणच्या तहसिलदारांना शिवसेना तालुकाप्रमुख श्री.बाळासाहेब मुलाणी यांनी केले आहे.
याबाबतच्या तक्रारी निवेदनामध्ये श्री.मुलाणी यांनी म्हटले आहे की,म्हसवडच्या सर्व्हे नं-११६७,१२२६ मधील वाळूचा ठेका देताना हा उपसा फक्त दिवसा करण्याची परवानगी संबंधितांना दिली होती.परंतू कोणत्याही यंत्रसामुग्रीशिवाय वाळूउपसा करण्याचे बंधन मोडले असून प्रत्यक्षात जेसीबी-ट्रॅक्टरने बेसूमार दिवसरात्र वाळूउपसा सुरू असून त्याचे व्हिडीओ रेकॉर्डींग प्रसिध्दी माध्यमांकडे उपलब्ध आहे.सदर ठेका श्री.जनार्धन देसाई यांचेकडे असला तरी प्रत्यक्षात हा ठेका तेजसिंह व दिपसिंह राजेमाने व त्यांचे मित्र अभिजीत नागमल चालवत आहेत.तरी ही बेसुमार वाळूउपसा ठेका कार्यवाही करुन तत्काळ बंद न झाल्यास दि:११ मे २०२२ रोजी सातारा जिल्हाधिकारी कार्यालयासमोर आमरण उपोषण करण्याचा इशारा श्री.मुलाणी यांनी माणच्या तहसिलदारांना दिलेल्या तक्रारी निवेदनात नमुद केले आहे.
