राज्यातील पोलीस उपनिरिक्षक पदाची भरती प्रक्रिया रखडली…
मुंबई प्रतिनिधी
महाराष्ट्र अराजपत्रित गट ब संयुक्त पूर्वपरीक्षा 8 ऑक्टोबर 2022 रोजी झाली होती. त्यानंतर MPSC कडून मुख्य परीक्षा 24 डिसेंबर 2022 पासून नियोजित होती, परंतु तृतीयपंथी उमेदवारासाठीचे निकष ठरवायचे असल्यामुळे मुख्य परीक्षा तब्बल 9 महिन्यानंतर म्हणजे 1 ऑक्टोबर आणि 29 ऑक्टोबर 2023 रोजी झाली.
यासोबतच झालेल्या दुय्यम निबंध (SR),सहाय्यक कक्ष अधिकारी(ASO), राज्यकर निरीक्षक(STI) या पदांचे अंतिम निकाल डिसेंबर 2023 मध्ये लागले आहेत.
मात्र पोलीस उपनिरीक्षक (PSI) या पदाचा निकाल लावला नाही व हा निकाल न लावण्याचे कुठलेही कारण किंवा स्पष्टीकरण आयोगाकडून मिळालेले नाही.यामुळे ही परीक्षा दिलेल्या उमेदवारांना मैदानी चाचणीचा सराव करावा की पुढील अभ्यास करावा याचा अंदाज येत नाही.
आगामी दिवसात लोकसभेची निवडणूक होणार असल्याने आचारसंहिता लागण्याची शक्यता आहे त्यामुळे हा निकाल रखडून शारीरिक चाचणी अनिश्चित कालावधीसाठी लांबणीवर पडण्याचीही शक्यता आहे, त्यामुळे येत्या आठवड्याभरात मुख्य परीक्षेचा निकाल जाहीर करून आचारसंहितेच्या अगोदरच शारीरिक चाचणीचे वेळापत्रक घोषित करून लवकरात लवकर शारीरिक चाचणी घ्यावी अशी विद्यार्थ्यांची मागणी आहे.
