संदीप खर्डेकर, अध्यक्ष, क्रिएटिव्ह फाउंडेशन यांचे श्री. गजानन मंडावरे, भारतीय पुरातत्त्व सर्वेक्षण, पुणे यांना निवेदन !!
विषय – शनिवारवाड्याची दुरावस्था, कचऱ्याचे साम्राज्य आणि हम कुछ नहीं करेंगे और किसी को कुछ करने नहीं देंगे ही या आपल्या खात्याची भूमिकेबाबत…
जगदीश का. काशिकर,
कायदा (लॉ) / सुरक्षा सल्लागार (कन्सलन्टंट) व मुक्त पत्रकार*, महाराष्ट्र. व्हाटसअप – ९७६८४२५७५७
मा. महोदय,
पुणे: आज काही पाहुण्यांसह शनिवारवाडा येथे जाण्याचा योग आला आणि तेथील दुरावस्था व आपल्या खात्याचा बेजबाबदार कारभार बघून दुःख आणि संताप अश्या मिश्र भावनांनी आपणास सदर निवेदन पाठवत आहे.25 रुपये प्रवेश फी दिल्यावर समोरच दिसला तो धुराचा लोट !! आपले सर्व सुरक्षारक्षक प्रवेश फी घेण्यात व्यग्र असताना आत कचरा जाळला जात होता.
या व्यतिरिक्त खालील बाबी ही क्लेशकारकच :-
1) सर्व माहितीफलक पुसट झाले असून त्यावरील माहिती नीट वाचता येत नाही.
2) सर्व कारंज्यात घाण साचली आहे.
3) वाहने पार्क करताना तेथे रक्षकाची व्यवस्था नसल्याने वेडीवाकडी वाहने पार्क केल्याने अडकाअडकी व वादविवाद होत आहेत.
4) लाईट अँड साउंड शो बंद असून आता सर्व निर्बंध शिथिल झाले असल्याने हा शो पुन्हा सुरु करण्यात यावा.
5) प्रेमी युगुलांना आळा घालण्यासाठी सुरक्षारक्षकांना सूचना द्याव्यात.
ह्या छोट्या गोष्टी असून त्या आपल्या अखत्यारित आपण करू शकता. मात्र एकूणच आपल्या खात्याची भूमिका आम्ही काही करणार नाही आणि कोणाला काही करू देणार नाही असे दिसते. आपल्याला किमान स्वच्छता ठेवायला जमत नसेल तर पुणेकरांच्या ह्या मानबिंदू ची स्वच्छता व रखरखावास माझ्या विश्वस्त संस्थेच्या माध्यमातून आम्ही सर्व जबाबदारी उचलू,आपण फक्त योग्य परवानगी द्यावी अशी आग्रही मागणी करत आहे. तसेच शनिवारवाड्यास एकूणच गतवैभव प्राप्त करून देण्यासाठीच्या आपल्या खात्याच्या आश्वासनाची सद्यस्थिती काय याची ही माहिती उपलब्ध करावी.
