‘सेल्फी विथ सक्सेस’मुळे विद्यार्थ्यांमध्ये वाढली अभ्यासाची गोडी
मुले शाळे बरोबरच घरीसुद्धा करू लागले हातोटीने अभ्यास
त-हाडी: स्वयंअध्ययनाद्वारे शिकून विद्यार्थ्यांना आनंदाची अनुभूती देणारा राज्य शासनाच्या शालेय शिक्षण विभागाचा ‘सेल्फी विथ सक्सेस’ हा उपक्रम जिल्हा परिषदेच्या प्राथमिक शाळांत सुरू करण्यात आला आहे.
‘सेल्फी विथ सक्सेस’ उपक्रमामध्ये विविध आव्हानात्मक कृतींच्या माध्यमातून शिकण्याची प्रक्रिया शाळेत राबवून मुलांना आव्हाने दिली जातात, जास्त आव्हाने पूर्ण करणाऱ्या मुलांसोबत सेल्फी घेतली जाते. शाळेतील उपक्रमशील शिक्षकांकडून विद्यार्थ्यांना पाच मिनिटांत जास्तीतजास्त जोड शब्द लिहिणे, यमक जुळणारे शब्द लिहिणे, समानार्थी व विरुद्धार्थी शब्द लिहिणे, कमी वेळात दिलेल्या उताऱ्यावर जास्तीतजास्त प्रश्न तयार करणे, इंग्रजी मुळाक्षरांपासून जास्तीतजास्त शब्द सांगणे व लिहिणे, दिलेल्या संख्यांची बेरीज, वजाबाकी, गुणाकार व भागाकार करणे अशी आव्हाने दिली जात आहेत.
ज्या विद्यार्थ्यांनी दिलेले आव्हान कमी वेळेत पूर्ण केले, त्या विद्यार्थ्यासोबत त्या शिक्षक, अथवा शिक्षिकेची सेल्फी काढण्यात येत आहे. या उपक्रमामुळे मुलांना एक वेगळा आनंद मिळत आहे. त्यामुळे विद्यार्थ्यांमध्ये अभ्यास करण्यासाठीची हातोटी वाढली असून विद्यार्थी शाळे बरोबरच घरी अभ्यास करण्यासाठी स्वयंप्रेरित होत आहेत.
त-हाडी : उत्कृष्ट ठरलेल्या विद्यार्थी, विद्यार्थींनी सोबत , जिल्हा परिषद प्राथमिक शाळा त-हाडीचे उपशिक्षिका शिवागी देवरे..
