आबांच्या जयंतीनिमित्त उपमुख्यमंत्री अजितदादा पवार यांनी श्रद्धांजली अर्पण करुन आठवणींना उजाळा दिला !!
जगदीश का. काशिकर,
कायदा (लॉ) / नाेकरी (जाॅब) सल्लागार (कन्सलन्टंट) व मुक्त पत्रकार*, महाराष्ट, व्हाटसअप – ९७६८४२५७५७
राष्ट्रवादीचे दिवंगत नेते आणि माजी गृहमंत्री आर आर पाटील (R R Patil) म्हणजेच आबा यांची आज जयंती. आबांच्या जयंतीनिमित्त उपमुख्यमंत्री अजितदादा पवार यांनी त्यांना श्रद्धांजली अर्पण करुन आठवणींना उजाळा दिला. महाराष्ट्राच्या राजकारणातला, राष्ट्रवादी काँग्रेस पक्षातला माझा सहकारी, जवळचा मित्र आज आपल्यासोबत नाही, याची खंत व दु:ख कायम मनात राहणार आहे अशा शब्दात उपमुख्यमंत्री अजितदादा पवार यांनी आबांना आदरांजली वाहिली. रोखठोक अजितदादा पवार आबांविषयी बोलताना कायम हळवे होतात. आजही आबांच्या जयंतीदिनी आबांविषयी भावना व्यक्त करताना अजितदादा पवार हळवे झाले.
राष्ट्रवादी काँग्रेस पक्षाचा स्वच्छ प्रतिमेचा सोज्ज्वळ चेहरा अशी आबांची ओळख होती.तीन तपांहून अधिकच्या राजकीय कारकिर्दीत भ्रष्टाचाराचा एकही आरोप त्यांच्यावर झाला नाही. ग्रामीण विकासाची आस, तंटामुक्त समाजाचा ध्यास घेऊन आर. आर. आबांनी राबवलेलं प्रत्येक अभियान लोकचळवळ बनलं. पारदर्शक, भ्रष्टाचारमुक्त भरती प्रक्रियेच्या आबांच्या निर्णयाने हजारो गरीब युवकांना पोलिस विभागात नौकरीची संधी उपलब्ध करुन दिली. डान्सबार बंदी, गुटखाबंदीच्या त्यांच्या निर्णयाने महाराष्ट्रातील कित्येक पिढयांना उद्धस्तहोण्यापासून वाचवले. महाराष्ट्राच्या ग्रामीण भागाचा चेहरामोहरा बदलण्याचं काम आर. आर. आबांनी यशस्वीपणे केले.
शहरी, ग्रामीण भागातील प्रत्येकाला आदर असलेलं, आपलंसं वाटणारं त्यांचं नेतृत्व होतं, असं सांगत स्वर्गीय आर. आर. आबांच्या स्मृतींना जयंतीदिनी अजितदादा पवार यांनी विनम्र अभिवादन केलं.
