नामवंत वकिल शीतल श्यामराव चव्हाण यांचे गरजवंत मराठ्यांना कळकळीची विनंती व आवाहन
जगदीश का. काशिकर,
मुक्त पत्रकार व गुंतवणुक/रोजगार – नोकरी/कामगार समस्या/कायदे सल्लागार, मुंबई, महाराष्ट्र. व्हाटसअप – ९७६८४२५७५७
मुंबई: महाराष्ट्र शासनाच्या सामाजिक न्याय व विशेष सहाय्य विभागाने कुणबी नोंद सापडलेल्या नागरिकांना अगर त्यांच्या सग्यासोयऱ्यांना, ते कुणब्यांचे सगेसोयरे असल्याचे पुरावे तपासून व गृहचौकशी करुन, कुणबी प्रमाणपत्र देण्याबाबतच्या “अध्यादेशाचा मसुदा” (कायदा किंवा अध्यादेश नव्हे) जाहीर झाला आहे. हा मसुदा अंतिम नसून या अध्यादेशावर आलेल्या सुचनांचा विचार करुन हा मसुदा दि.१६ फेब्रूवारी, २०२४ किंवा त्यानंतर सुनिश्चित केला जाणार आहे. या मसुद्यानुसार सर्व गरजवंत मराठ्यांना आरक्षणाचा लाभ मिळेल किंवा नाही याचा सारासार विचार करुन, त्यात येणाऱ्या तांत्रिक अडचणींचा निपटारा करण्यासाठी आणि या मसुद्यानुसार येणारा अध्यादेश कोर्टात टिकावा यासाठीच्या सुचनांवर चर्चा, विचार-विनिमय होणे आवश्यक आहे.
असे असताना आधीच खर्चात अखंड बुडालेल्या मराठ्यांनी डी.जे., फटाके, गुलाल उडवण्याचा आततायीपणा करु नये. आधी गरजवंत मराठ्यांच्या पदरात प्रत्यक्ष लाभ पाडून घेवू. शिवाय ही लढाई गरजवंत मराठ्यांची असल्याने शिक्षणसम्राट, साखरसम्राट, आजी अगर माजी सत्ताधारी प्रस्थापित किंवा त्यांचे लाभधारी नातेवाईक यांनी या लढ्यात घुसखोरी करुन या विजयाचे आम्हीच शिल्पकार असल्याच्या आविर्भावात मिरवण्याची आवश्यकता नाही. धर्माचे, देवाचे, जातीपातीचे राजकारण झाले. पण आपल्या गरजेच्या असलेल्या आरक्षणाचे राजकारण होवू नये यासाठी गरजवंत मराठ्यांनी कटीबद्ध राहणे आणि तो लाभ प्रत्यक्ष पदरात पडे पर्यंत संयम पाळणे आवश्यक आहे. चुकभूल द्यावी-घ्यावी.
