दुष्काळातही लाखोंची कमाई! 44 अंशांच्या उन्हात फुलली ‘पिवळ्या खजुराची’ शेती, एकरी 3 लाखांची कमाई
छत्रपती संभाजीनगर जिल्ह्यातील गंगापूर तालुक्यातील गंगामाई कृषी उद्योगाने दुष्काळी भागात पिवळ्या खजुराची यशस्वी शेती करून शेतकऱ्यांसाठी नवा आदर्श निर्माण केला आहे. कमी पाण्यावर, कमी रोगप्रादुर्भावात आणि सेंद्रिय पद्धतीने घेतले जाणारे हे पीक मराठवाड्यासाठी फायदेशीर ठरत आहे.
२०१८ मध्ये गुजरातमधून रोपे आणून १० एकरांवर लागवड करण्यात आली. ठिबक सिंचन, शेणखत आणि संतुलित व्यवस्थापनामुळे एका झाडापासून ५० ते १५० किलोपर्यंत उत्पादन मिळत आहे. सुरुवातीला एकरी सुमारे २.७५ लाख रुपयांचा खर्च येत असला तरी त्यानंतर २० ते २५ वर्षे दरवर्षी एकरी सुमारे ३ लाख रुपयांचे उत्पन्न मिळू शकते, असा दावा करण्यात आला आहे. त्यामुळे पिवळ्या खजुराची शेती शेतकऱ्यांसाठी उत्पन्नाचा नवा पर्याय ठरत आहे.
