माजी जलसंपदा मंत्री जयंत पाटलांना फडणवीस-शिंदे सरकारचा दणका
जलसंपदा विभागातील ३ हजार कोटींच्या कामांना स्थगिती
मुंबई —
छगन भुजबळ यांनी मंजूर केलेल्या कामांना स्थगिती दिल्यानंतर फडणवीस-शिंदे सरकारने आता जयंत पाटील यांनी मंजूर केलेल्या जलसंपदा विभागातील तीन हजार कोटींच्या कामांना तातडीने स्थगिती देण्याचा निर्णय घेतला आहे. ही सर्व कामे केवळ एका सांगली जिल्ह्यात होणार होती. या स्थगितीच्या आदेशामुळे जिल्ह्यातील तीन हजार कोटी रुपयांची सिंचनाची कामे रखडणार आहेत. पाण्याच्या प्रतीक्षेत असलेली शेकडो गावे पाण्यापासून वंचित राहण्याची शक्यता आहे.
सिंचन योजनांपासून वंचित असलेल्या जिल्ह्यातील सर्व गावांत पाणी देण्याचा निर्णय तत्कालीन जलसंपदामंत्री जयंत पाटील यांच्या पुढाकाराने घेण्यात आला होता. त्यासाठी ०३ हजार, ८५८ कोटी रुपयांच्या निधीची तरतूद करण्यात आली होती. सुमारे १ लाख, १८ हजार हेक्टर क्षेत्र ओलिताखाली येणार होते. मात्र, शिंदे सरकारने जिल्हानियोजनमधील कामांना स्थगिती देण्याचे आदेश काढले. त्यामुळे जिल्ह्यातील सुमारे ७५ कोटींच्या कामांना स्थगिती मिळाली आहे.
सांगली जिल्ह्याचा पूर्वभाग हा दुष्काळी आहे. याची दखल घेत तत्कालीन जलसंपदामंत्री जयंत पाटील यांनी पुढाकार घेऊन जिल्हा दुष्काळमुक्त होण्यासाठी जोरदार प्रयत्न केले. जल लवादाकडून यासाठी जिल्ह्याकरिता अतिरिक्त पाणी मंजूर करून घेतले. हे पाणी प्रत्येक गावांत पोहोचण्यासाठी ३ हजार, ८५८ कोटी निधीची तरतूदही केली. यात ‘म्हैसाळ’ योजनेतून जत तालुक्यातील ६४ गावांसाठी सहा टीएमसी पाणी, ‘टेंभू’ योजनेतून वंचित असलेल्या १०९ गावांत आठ टीएमसी पाणी ताकारी, म्हैसाळ योजनेवर बंदिस्त पाईपलाईनद्वारे ४० गावांत पाणी उपलब्ध करून देण्यात येत होते.
‘आरग-बेडग’ योजनेतून १,१०० हेक्टर क्षेत्र पाण्याखाली येणार होते. वाळवा तालुक्यातील रेठरे हरणाक्ष, भवानीनगर, किल्ले मच्छींद्रगड या परिसरात ‘ताकारी-दुधारी’ योजना राबविण्यात येणार होती.कृष्णा कॉनलच्या लाईनिंगचे कामही धरण्यात आलेले होते. वाकुर्डे टप्पा क्र. २चे काम धरण्यात आलेले होते. त्यामुळे वाळवा तालुक्यातील २० गावांतील शेती सिंचनाखाली येणार होती
