कांदा, गहू ,हरभरा पिकासाठी १५ डिसेंबर पर्यंत भरता येणार पिकविमा

२४-२५ रब्बी पिक विमा अर्ज भरण्यास सुरुवात

कांदा, गहू ,हरभरा पिकासाठी १५ डिसेंबर पर्यंत भरता येणार पिकविमा

२४-२५ रब्बी पिक विमा अर्ज भरण्यास सुरुवात

त-हाडी: राज्य शासनाने जून-
२०२३ मध्ये सर्वसमावेशक पीकविमा योजना सुरू केली आहे. शेतकऱ्यांना खरीप हंगामाप्रमाणे रबी हंगामातही केवळ एक रुपया भरून पीकविमा योजनेत सहभागी होता येणार आहे. १ नोव्हेंबर ते १५ डिसेंबरपर्यंत गहू, कांदा व हरभरा यासाठी पीकविमा भरता येणार आहे.

राज्य शासनाने यावर्षीपासून शेतकऱ्यांना प्रति एक रुपया याप्रमाणे पीकविमा योजनेस सुरुवात केली आहे. नैसर्गिक आपत्ती कीड आणि रोगामुळे पिकांचे नुकसान झाल्यास शेतकऱ्यांना पीकविमा योजनेंतर्गत मदत मिळू शकेल. अतिवृष्टी, अवकाळी पाऊस व दुष्काळ यासारख्या नैसर्गिक आपत्तीमुळे पिकांचे मोठ्या प्रमाणात नुकसान होते. त्यामुळे शेतकऱ्यांनी रबी हंगामासाठी पीकविमा काढून घेणे फायद्याचे ठरणार आहे. शेतकऱ्यांनी वेळेवर पीकविमा अर्ज व्यवस्थित भरावा, यामुळे अडचण येणार नसल्याचे सांगण्यात आले आहे.

पीकविमा भरण्याचे आवाहन

पावसाळ्यात झालेल्या अतिवृष्टीमुळे खरिपातील पिकांना मोठा फटका बसला आहे त्यामुळे शेतकऱ्यांची भिस्त आता रबी पिकांवर आहे. त्यामुळे शेतकऱ्यांनी रब्बी हंगामातील पिकांची नुकसान भरपाई करून घेण्यासाठी पीकविमा भरणे आवश्यक आहे.

शेतकऱ्यांना १ नोव्हेंबर १५ डिसेंबर या कालावधीत गहू, कांदा, हरभरा तर रब्बी ज्वारी ३० नोव्हेंबरपर्यंत तर उन्हाळी भात व उन्हाळी भुईमूग या पिकांना ३१ मार्च २०२५ पर्यंत पिकांचा पीकविमा भरता येणार आहे.

सीएससीवर अर्ज भरता येईल

रब्बी हंगामातील पीकविमा योजनेत सहभागी होण्यासाठी वेगवेगळे पर्याय उपलब्ध करून देण्यात आले आहेत.
www.pmfby.gov.in या संकेतस्थळावर जाऊन शेतकरी पीकविमा अर्ज भरू शकतात. बँका, विमा कंपनी प्रतिनिधी व सामूहिक सेवा केंद्र यांच्यामार्फतही पीकविमा अर्ज दाखल केला जाऊ शकतो.

खरीप हंगामात शेतकऱ्यांनी एका पिकासाठी एक रुपया देऊन विमा भरला होता. शेतकऱ्यांचा प्रीमियम केंद्र व राज्य शासनाने पीकविमा कंपनीला दिला आहे. त्यामुळे अग्रिमची रक्कम शेतकऱ्यांना मिळत आहे. सर्व अधिसूचित पिकांसाठी ७० टक्के जोखीमस्तर निश्चित करण्यात आलेला आहे. त्यानुसार रब्बीत देखील शेतकऱ्यांना विमा रक्कम दिली जाणार आहे. पीकविमा योजना अधिसूचित पिकांसाठी लागू राहणार आहे. रब्बी गहू बागायती, ज्वारी बागायती, हरभरा, कांदा, तसेच उन्हाळी भात, उन्हाळी भुईमूग ही पिके अधिमुचित करण्यात आली आहेत.

पीक विमा नोंदणीची अंतिम तारीख

रब्बी ज्वारी – ३० नोव्हेंबर २०२४

बागायत गहु, हरभरा कांदा व अन्य पिके – १५ डिसेंबर २०२४

उन्हाळी भात व उन्हाळी भुईमूग – ३१ मार्च २०२५