बच्चू कडूंच्या बेमुदत अन्नत्याग आंदोलनाला ‘ग्रामनिष्ठा संघर्ष समिती, तऱ्हाडी’चा जाहीर पाठिंबा
त-हाडी
शिरपूर (जि. धुळे), दि. 10 जून 2025:
शेतकरी, शेतमजूर, दिव्यांग, विधवा महिला, युवक, वंचित घटक आणि ग्रामीण जनतेच्या मूलभूत हक्कांसाठी प्रहार जनशक्ती पक्षाचे संस्थापक अध्यक्ष मा. बच्चू कडू यांनी घेतलेल्या बेमुदत अन्नत्याग आंदोलनास ग्रामनिष्ठा संघर्ष समिती, तऱ्हाडी. या स्थानिक जनआंदोलन संघटनेने आपला जाहीर पाठिंबा जाहीर करत आंदोलनाला नवे बळ दिले आहे.
ग्रामनिष्ठा संघर्ष समितीचे प्रतिनिधी . भुषण माधव बागुल यांनी बच्चू कडू यांना पाठिंब्याचे पत्र दिले असून, त्यांच्या आंदोलनातील १४ प्रमुख मागण्यांशी समितीने पूर्णपणे सहमती दर्शवली आहे. या मागण्यांमध्ये दिव्यांग व विधवा महिलांना रु. ६०००/- मासिक मानधन, शेतकऱ्यांसाठी हमीभावासह 20% अनुदान, शेतमाल आणि फळपिकांना MSP, युवकांसाठी रोजगार किंवा सन्मानजनक बेरोजगारी भत्ता, मनरेगा मजुरीत वाढ, ग्रामीण घरकुलासाठी शहरासारखे निकष व अनुदान, तसेच गायीच्या दूधाला रु. 50/- आणि म्हशीच्या दूधाला रु. 60/- बेस रेट या महत्त्वपूर्ण मागण्यांचा समावेश आहे. या पार्श्वभूमीवर दोघांमध्ये फोनवर सविस्तर संवाद झाला. या संभाषणात मा. बच्चू कडूंनी समितीच्या पाठींब्याबद्दल मनापासून आभार व्यक्त केले
या आंदोलनातील मागण्या केवळ भावनिक आवाहन नसून, त्या सामाजिक न्याय, आर्थिक हक्क आणि ग्रामीण भागातील वास्तवाशी नातं सांगणाऱ्या आहेत.
भुषण बागुल यांनी म्हटले आहे की, “हा लढा केवळ एका व्यक्तीचा नसून संपूर्ण ग्रामीण जनतेचा आहे. ग्रामनिष्ठा संघर्ष समिती या लढ्यात तन-मनाने सहभागी असून, शेतकऱ्यांच्या न्याय्य हक्कांसाठी लढा देण्यासाठी कटिबद्ध आहे,” असा ठाम निर्धार समितीने आपल्या पत्राद्वारे व्यक्त केला आहे. राज्य शासनाने या मागण्यांकडे डोळसपणे आणि तातडीने लक्ष देणे आवश्यक आहे, अन्यथा या लढ्याचा विस्तार आगामी काळात उग्र व निर्णायक स्वरूप धारण करू शकतो.
