गोरगरीब सेक्स वर्कर महिलांना न्याय कोण देणार – विलास रुपवते
मुंबई, महाराष्ट्र. व्हाटसअप – ९७६८४२५७५७मुंबई – इंग्रजांच्या काळापासून अस्तित्वात असलेला मुंबईतील पारंपरिक रेड लाइट बाजार ६ जून २०२५ पासून अधिकृतरित्या बंद करण्यात आला आहे. या पार्श्वभूमीवर, दिनांक २० जून २०२५ रोजी सकाळी ११ वाजता ग्रँट रोड येथील दिनेश बिल्डिंगमध्ये धडक कारवाई करण्यात आली.
या कारवाईत ८ घरांचे दरवाजे तोडले गेले असून, लूटमार झाल्याची शक्यता व्यक्त करण्यात येत आहे.सेक्स वर्कर महिलांचे म्हणणे आहे की, “आम्ही सर्वजणी आपापल्या घरात शांततेत होतो, व्यवसाय आधीच बंद करण्यात आलेला आहे, तरीही डीसीपी ऑफिसमधील कर्मचाऱ्यांनी दरवाजे तोडून जबरदस्तीने आम्हाला डी.बी. मार्ग पोलीस ठाण्यात नेले.”ही कारवाई मंगल प्रभात लोढा यांच्या मतदारसंघात होणाऱ्या ‘री-डेव्हलपमेंट’ प्रकल्पाच्या पार्श्वभूमीवर सुरू असल्याचे आरोप करण्यात येत आहेत. लोकप्रतिनिधींनी विकासाच्या नावाखाली या गोरगरीब महिलांना पायाखालून जमीन काढून टाकण्याचा प्रयत्न केला जात असल्याचे महिला संघटनांचे म्हणणे आहे.
विलास रुपवते, अध्यक्ष – महाराष्ट्र निराधार देवदासी महिला संघटना यांनी म्हटले आहे की, “सेक्स वर्कर महिलांनी कुणाचा खून, लुटमार, किंवा गुन्हा केलेला नाही, तरीदेखील DCP आणि त्यांच्या स्टाफने दादागिरी करून महिलांवर अन्याय केला आहे. जर या महिला नसतील, तर विकृत प्रवृत्तीचे लोक चांगल्या घरातील महिलांवर अत्याचार करतील. या महिलांनी समाजातील अनेक विकृत पुरुषांचे लैंगिक विकार थांबवले आहेत.
रेड लाइट बाजार बंद झाला, तर रस्त्यावर तुमच्या-आमच्यासारख्या सन्माननीय महिलांनाही सुरक्षितता राहणार नाही.”या प्रकारामुळे संपूर्ण मुंबईतील पोलीस दलाचे नाव काही अपप्रवृत्तीमुळे बदनाम होत आहे. कायदेशीर प्रक्रिया असताना दरवाजे तोडणे, लूट करणे आणि महिलांना जबरदस्तीने घेऊन जाणे ही घटनाच गंभीर आहे.यासंदर्भात महाराष्ट्र निराधार देवदासी महिला संघटना कडून लवकरच राज्यभरात आक्रोश मोर्चा काढण्यात येणार आहे. राज्य सरकार, गृहमंत्री, आणि मुख्यमंत्री यांनी या मुद्द्याकडे गांभीर्याने लक्ष द्यावे, अन्यथा व्यापक आंदोलन उभे राहील, असा इशारा संघटनेकडून देण्यात आला आहे.
