वरूळ परिसरात बिबट्याचा हैदोस; एका दिवसात ४ पाळीव प्राणी फस्त
सापळे लावूनही वनविभागाचे अपयश; शेतकरी-मजुरांत भीतीचे वातावरण
त-हाडी/- तालुक्यातील वरूळ परिसरात 16 नोव्हेंबर 2025 रोजी सकाळी उघडकीस आलेल्या घटनांनी गावकऱ्यांमध्ये भीतीचे वातावरण निर्माण झाले आहे. एका दिवसात दोन वेगवेगळ्या ठिकाणी बिबट्याने तब्बल चार पाळीव प्राणी फस्त केल्याचे समोर आले आहे. गेल्या काही महिन्यांपासून परिसरात सापळे लावूनही वनविभागाला बिबट्याला पकडण्यात अपयश येत असल्याने नागरिकांमध्ये नाराजी आणि आश्चर्य व्यक्त केले जात आहे.
वरूळ शिवारातील शेतकरी दशरथ उखा पटेल यांच्या शेतात घमा रामा ठेलारी यांचा मेंढ्यांचा वाडा, तर जवखेडा शिवारात भटाने येथील ज्ञानेश्वर राजधर पाटील यांच्या शेतात यंदा पासू कोळपे यांचा वाडा चरण्यासाठी ठेवण्यात आला आहे दरम्यान, 16 नोव्हेंबरच्या मध्यरात्रीच्या सुमारास बिबट्याने दोन्ही ठिकाणी हल्ला चढवला. घमा ठेलारी यांच्या वाड्यातील एक मेंढी आणि दोन कोकरू तर यंदा कोळपे यांच्या वाड्यातील एक मेंढी यांचा बिबट्याने फडशा पाडला.घटनेची माहिती मिळताच वनपाल काशिनाथ सूर्यवंशी, वनरक्षक ए.टी. कोसदे आणि जी.डी. ठाकरे यांनी घटनास्थळी भेट देऊन पंचनामा केला. मागील 15 दिवसांत बोराडी वनक्षेत्रात 10 तर एक महिन्यात 14 पाळीव प्राणी बिबट्याने फस्त केल्याची माहिती वनपाल सूर्यवंशी यांनी दिली
. यापैकी सहा लाभार्थ्यांना आर्थिक मदत देण्यात आल्याचेही त्यांनी सांगितले. वनविभागाने गेल्या महिन्यात परिसरात सापळे आणि सीसीटीव्ही कॅमेरे बसवले असले तरी बिबट्या सापळ्यात न अडकता केवळ कॅमेऱ्यातच कैद होत असल्याची माहितीही सूर्यवंशी यांनी दिली.
वाढत्या हल्ल्यांमुळे परिसरातील शेतकरी,मेंढपाळ आणि शेतमजुरांमध्ये तीव्र भीतीचे वातावरण निर्माण झाले आहे. स्थानिकांनी वनविभागाकडे लवकरात लवकर योग्य ती कारवाई करून बिबट्याचा बंदोबस्त करण्याची मागणी केली आहे.
