मोर्वा शाळेत अवतरल्या क्रांतीज्योती सावित्रीबाई फुले”बालिका दिनानिमित शाळेत विविध स्पर्धांचे आयोजन ”
मुंबई :- प्रतिनिधी
मीरा-भाईंदर महानगरपालिका शाळा क्रमांक 24 मोर्वा पांडुरंग राजाराम म्हात्रे या शाळेमध्ये बालिका दिनानिमित्त चक्क क्रांतीज्योती सावित्रीबाई फुले अवतरल्या होत्या. निम्मित होते क्रांतीज्योती सावित्रीबाई फुले यांच्या जयंतीचे.
क्रांतीज्योती सावित्रीबाई फुले यांची जयंती सर्वत्र बालिका दिन म्हणून साजरा केला जातो. या दिनाच्या निमित्ताने शाळेच्या वतीने वेशभूषा ,नाटक,वकृत्व स्पर्धांचे आयोजन करण्यात आले होते. या स्पर्धेत विद्यार्थी विद्यार्थिनींनी मोठ्या उत्साहात सहभाग नोंदवला.
या स्पर्धेचा शुभारंभ शाळेच्या मुख्याध्यापिका मंदाकिनी लामखडे यांनी सावित्रीबाई फुलेंच्या प्रतिमेचे पूजन करून केला. यावेळी ज्येष्ठ शिक्षिका कल्पना भोई यांनी प्रतिमेला पुष्पहार प्रदान केला.
यावेळी उपस्थितांना मार्गदर्शन करताना मुख्याध्यापिका मंदाकिनी लामखडे यांनी सावित्रीबाई फुले यांच्या जीवनातील संघर्ष ,त्यांच्या आदर्श व कष्टमय कार्याची माहिती दिली. त्यानंतर शाळेत आयोजित वेशभूषा स्पर्धेची सुरवात करण्यात आली. या स्पर्धेमध्ये सहभागी विद्यार्थ्यांनी कोणी शेतकरी, कोणी पंडित जवाहरलाल नेहरू, महात्मा ज्योतिबा फुले, राजमाता जिजामाता,झाशीची राणी लक्ष्मीबाई,सावित्रीबाई फुले यांची तर कोणी राजकीय नेते, तर विविधतेत एकतेचे दर्शन घडवणारे दक्षिण,गुजराती,महाराष्ट्रीयन ,बंगाली असे विविध प्रकारच्या वेशभूषा परिधान केल्या होत्या. यामध्ये बालिका दिनाच्या निमित्ताने साकारण्यात आलेली क्रांतिज्योती सावित्रीबाई फुले यांची वेशभूषेकडे सर्वांचे लक्ष केंद्रित झाले होते. जणू स्वतः सावित्रीबाईच शाळेत आवतरीत झाल्या असाव्यात.
यानिमित्ताने मूल्यांवर आधारित नाटिका सादर करण्यात आली. यातील सहभागी विद्यार्थ्यांनी अतिशय उत्तम प्रकारे नाटकाचे सादरीकरण केले. तसेच यावेळी वकृत्व स्पर्धेची आयोजन करण्यात आले होते. यामध्ये विद्यार्थी विद्यार्थिनींनी सहभाग नोंदवताना आपल्या वक्तृत्वात क्रांतीज्योती सावित्रीबाईंच्या जीवनाची माहिती श्रोत्यांना दिली. या विविध स्पर्धांमध्ये यश मिळालेल्या विद्यार्थी विद्यार्थिनी यांना मान्यवरांच्या हस्ते बक्षिसाचे वितरण करण्यात आले. शेवटी उपस्थितांचे आभार आरती कोळी मॅडम यांनी मानले.
सदर स्पर्धा यशस्वीरित्या संपन्न होण्यासाठी मुख्याध्यापिका लामखडे यांच्या मार्गदर्शनाखाली शर्मिष्ठा ढोकणे मॅडम,अमोल सोळंकी सर, योगेश्वरी देशमुख मॅडम,आरती कोळी मॅडम, ज्योती बारे मॅडम ,प्रीतम जाखरे व शाळा कर्मचारी यांनी परिश्रम घेतले.
