शेवटी देवाक काळजी !ज्येष्ठ पत्रकार दिलीप मालवणकर, उल्हासनगर यांचे मनोगत !!
जगदीश का. काशिकर,मुक्त पत्रकार व गुंतवणुक/रोजगार – नोकरी/कामगार समस्या/कायदे सल्लागार, मुंबई, महाराष्ट्र. व्हाटसअप – ९७६८४२५७५७.मालवणी माणसं श्रद्धाळू असतात परंतु अंधश्रद्ध नसतात. त्यामुळेच मालवणी माणूस “देवाक काळजी” म्हणून निर्धास्त असतो. कोंकणातील देव देवता जागृत देव म्हणून ओळखल्या जातात. त्यांच्या ग्रामदेवताही जागृत असतात.
त्यामुळे कोकणी माणसं उदरनिर्वाहासाठी जरी मुंबई पुण्यात आले तरी गावची जत्रा कधीच चुकवत नाहीत. नवस करणे, गाऱ्हाने घालणे व ते फेडणे हा मालवणी माणसाचा नित्यक्रम असतो.मी अंधश्रद्ध नाही परंतू श्रद्धावान आहे.म्हणून माझ्या तोंडी “देवाक काळजी” हे वाक्य सतत असते. तीन दिवसापूर्वी माझ्यावर जो भेकड हल्ला झाला, त्या प्राणघातक हल्ल्यातून मी बचावलो. भरपूर मुका मार लागला व खांद्याचे हाडाला फ्रॅक्चर झाले. त्यानंतर पोलीस तपास कासवगतीने सुरू आहे. विठ्ठलवाडी पोलीस स्टेशनचा एक सेटिंगबाज पोलीस या प्रकरणात सेटिंग करीत आहे. राजकीय दबाव देखील आहे. पोलीस, न्यायालये अविश्वसनीय झाली आहेत. त्यामुळे न्याय मिळेलच, याची खात्री देता येत नाही.माझा माझ्या देवतांवर विश्वास आहे.
त्यामुळे यापूर्वी माझ्यावरील दोन प्राणघातक हल्ल्यातून सुखरूप बचावलो. या वेळी मात्र माझा घात झाला व मला एकाकी व बेसावध गाठून हा हल्ला झाला. तिसेक वर्षांपूर्वी दोन दारुड्याचे भांडण सोडवताना त्या दोघांनी मिळून मला मारहाण केली होती. त्यानंतर पोलिसांनी थातूरमातुर दंड लावून त्यांना सोडून दिले होते
. मात्र नियतीला हा न्याय मंजूर नव्हता. काही महिन्यातच त्या दोन दारुड्या पैकी एकाला त्याच्या पत्नीने जाळून मारले होते तर दुसऱ्याचा मुलगा पाण्याच्या टाकीत बुडून मेला. उगाच त्या निष्पाप बालकाचा जीव गेला. माझ्या निवडणुकीच्या वेळी माझ्यावर काळी करणी करून पराभूत करण्याचा प्रयत्न करणाऱ्याचे आई बाप बहीण व मेव्हणाही वारला. एक गुंड कुत्र्याच्या मौतीने भरदिवसा मारला गेला. हा नियतीचा न्याय आहे. अशी अनेक प्रकरणे आहेत. म्हणून माझ्या पाठीशी पोलीस, न्यायदेवता जरी उभी राहिली नाही तरी माझ्यावरील हल्लेखोर व त्यांचे सूत्रधार यांना नियतीच क्रूर शिक्षा देईल, याची मला खात्री आहे. मी नेहमी सत्याची पाठराखण करीत आलो आहे,
म्हणूनच परमेश्वर माझे नेहमी रक्षण करतो. एकदा तर सात आठ सशस्त्र मारेकरी मला ठार मारण्यासाठी आले होते, परंतू माझ्या प्रसंगावधाणामुळे व धैर्यामुळे मी वाचलो. त्यांना हात हालवत परत जावे लागले. त्यांच्या सूत्रधार भाईला MPDA खाली तुरुंगावास पत्करावा लागला होता.*येत्या तीन महिन्याच्या आत माझ्यावरील हल्ल्यातील सूत्रधारांचे वाटोळे झाले नाही तर मी माझ्या देवतांचे नाव घेणार नाही
.* हा शाप नाही. एका प्रामाणिक व निष्ठावंत कार्यकर्त्यावर, एका निष्पक्ष व निर्भीड पत्रकारावर भाडोत्री गुंडा मार्फत भ्याड हल्ला करणाऱ्यावर नियती घाला घातल्याशिवाय राहणार नाही. माझ्या आप्तस्वकीय व चाहत्यांचा तळतळात त्यांना भोवल्या शिवाय राहणार नाही. *या पुढे नियतीमुळे त्यांचे जे भोग सुरू होतील, ते सर्वांना कळतीलच.शेवटी देवाक काळजी !
