खरसुंडीतील ट्रस्टवर चांदीच्या फेटा अपहाराचा गंभीर आरोप…
आटपाडी पोलीस ठाण्यात तक्रार दाखल तीर्थक्षेत्र खरसुंडी ता. आटपाडी येथील श्री. सिद्धनाथ मंदिरातील श्रीनाथ देवस्थान विश्वस्त मंडळाने भाविकाने अर्पण केलेल्या चांदीच्या फेट्याचा अपहार केल्याचा खळबळजनक प्रकार समोर आला आहे.
याबाबत शिवाजी सिताराम निकम रा.देविखिडी ता. खानापूर यांनी आटपाडी पोलीस ठाण्यात रीतसर पावत्या आणि पुरावे जोडून तक्रार अर्ज दाखल केला आहे, यात मंदिर प्रशासनाच्या कारभारावर गंभीर प्रश्नचिन्ह उपस्थित केला आहे.
तक्रारदार शिवाजी निकम यांनी दिलेल्या माहितीनुसार, त्यांनी २००३ मध्ये श्री. सिद्धनाथ चरणी १ किलो ५२५ ग्रॅम वजनाचा चांदीचा फेटा अर्पण केला होता. काही काळापूर्वी त्यांनी या फेट्याबाबत मंदिर प्रशासनाकडे विचारणा केली असता, विश्वस्त मंडळाचे अध्यक्ष चंद्रकांत पुजारी यांनी हा फेटा वितळवून त्याचा वापर चांदीच्या रथाच्या कामासाठी केल्याचे सांगितले.
मात्र, काही दिवसांनंतर दुसरे विश्वस्त विजयकुमार भांगे यांनी फेटा वितळवला नसून तो सुरक्षित असल्याचे सांगत तक्रारदाराला वेळोवेळी आश्वासने दिली होती. चार ते पाच महिन्यांच्या सातत्यपूर्ण पाठपुराव्यानंतरही फेटा मिळत नसल्याने निकम यांनी आक्रमक पवित्रा घेतला.
वजनात तफावत आणि धमकावल्याचा आरोप.
तक्रार अर्जात नमूद केल्यानुसार, वारंवार विचारणा केल्यानंतर मंदिर प्रशासनाकडून एक चांदीचा फेटा दाखवण्यात आला. मात्र, त्याचे वजन केले असता ते १ किलो ८० ग्रॅम भरले. तसेच या वस्तूवर कोणाचेही नाव कोरलेले नव्हते. निकम यांनी अर्पण केलेला फेटा १.५२५ किलोचा आणि त्यावर बेंगलोर डिझाईन आणि त्यांचे नाव कोरलेले होते. त्यामुळे दाखवलेली वस्तू आपली नसल्याचे त्यांनी स्पष्ट केले. या गोंधळानंतर निकम यांनी पोलिसांत तक्रार करण्याची भूमिका मांडली असता, संबंधित व्यक्तींनी आपली भाषा बदलून त्यांना धमकावल्याचा आरोपही अर्जात करण्यात आला आहे.
