“महावितरणच्या वीजयंत्रणेजवळ कचरा टाकू नका” – लाईमन विवेक कोळी यांचे आवाहनत
-हाडी- प्रतिनिधी त-हाडी : वाढत्या उन्हामुळे आग लागण्याच्या घटनांत वाढ होत असून, वीजयंत्रणेजवळ कचरा टाकणे व तो जाळणे ही गंभीर समस्या बनली आहे. शिरपूर व त-हाडी परिसरात महावितरणच्या वारंवार सूचनांनंतरही रोहित्रांच्या (ट्रान्सफॉर्मर) जवळ कचरा टाकण्याचे व जाळण्याचे प्रकार थांबत नसल्याचे दिसून येत आहे
.मागील वर्षी अशाच प्रकारामुळे रोहित्राला आग लागून ते जळाले होते. यामुळे वीजपुरवठा खंडित होऊन लाखो रुपयांचे नुकसान झाले होते. यंदाही वाढत्या तापमानामुळे अशी परिस्थिती निर्माण होण्याची शक्यता लक्षात घेता महावितरण प्रशासनाने नागरिकांना सतर्कतेचा इशारा दिला आहे.शहरातील व ग्रामीण भागातील अनेक ठिकाणी रस्त्याच्या कडेला, मोकळ्या जागेत तसेच वीजपुरवठा करणाऱ्या रोहित्रांच्या आसपास कचरा टाकून तो जाळण्याचे प्रमाण कायम आहे.
उन्हामुळे आधीच तापलेले रोहित्र आणि त्याजवळ पेटवलेला कचरा यामुळे रोहित्राचे तापमान झपाट्याने वाढते. परिणामी आग लागण्याचा किंवा स्फोट होण्याचाही धोका संभवतो.याशिवाय, रोहित्रातील ऑईल लिकेज झाल्यास कचऱ्याला आग लागून मोठी दुर्घटना घडू शकते. अशा घटनांमुळे केवळ वीजयंत्रणेलाच नव्हे, तर नागरिकांनाही मोठा फटका बसतो. वीजपुरवठा खंडित झाल्याने जनजीवन विस्कळीत होते.या पार्श्वभूमीवर नागरिकांनी वीजयंत्रणेजवळ कचरा टाकू नये किंवा जाळू नये, तसेच अशा प्रकारांना आळा घालावा, असे आवाहन त-हाडी येथील लाईनमन विवेक कोळी यांनी केले आहे.
दरम्यान, रोहित्राला आग लागल्यास तात्काळ अग्निशमन दलाशी संपर्क साधावा तसेच महावितरणच्या १८००-२३३-३४३५ या टोल फ्री क्रमांकावर किंवा जवळच्या कार्यालयात माहिती द्यावी, असेही प्रशासनाने स्पष्ट केले आहे.नागरिकांनी सजग राहून वीजयंत्रणेचे संरक्षण केल्यास अपघात टाळता येतील आणि अखंडित वीजपुरवठा राखणे शक्य होईल.
