पंढरपुरात तापमान वाढ रोखणारा गादेगाव पॅटर्न राबवा .कबरस्थानात सोयींसह ” सर्वांसाठी ” शववाहिका बस सुरु करा .सादिक खाटीक यांची नगराध्यक्षा प्रणिता भालकेंकडे मागणी .
आटपाडी प्रतिनिधी पंढरपूरचे तापमान कमी करण्यासाठी ऑक्सीजन पार्क, मुस्लीम कबरस्थान मध्ये सुविधा करण्याबरोबर पार्थीव व नातलगांच्या वाहतुकीसाठी खास बसेसची सोय करावी अशी मागणी राष्ट्रवादी काँग्रेस पार्टी शरदचंद्र पवार ओबीसी विभागाचे प्रदेशचे उपाध्यक्ष, आटपाडीचे सादिक खाटीक यांनी केली आहे .
आटपाडीच्या सुकन्या आणि पंढरपुरच्या नगराध्यक्षा डॉ . सौ . प्रणिता भगिरथ भालके यांच्याकडे सादिक खाटीक यांनी या मागण्या केल्या आहेत . पंढरपूर तालुक्यातल्या गादेगावात वड, पिंपळ, करंज लिंब चिंच, गुलमोहोर वगैरे १ हजार पेक्षा जास्त वृक्षांच्या उभारणीतून ऑक्सीजन पार्क साकारले गेले आहे.
शिवाय प्रचंड सावली बरोबरच देशातल्या लाखो ठिकाणच्या तापमानाच्या तुलनेत ५ ते ७ अंशांनी तेथील तापमान कमी राहिल्याचे सिद्ध झाले आहे . हे लक्षात घेऊन पंढरपुर शहरातील शेकडो ठिकाणच्या शासकीय पडीक जागांवर वड, पिंपळ वगैरे २४ तास ऑक्सीजन सोडणाऱ्या किमान १० हजार वृक्षांची उभारणी करून पंढरपूर शहरासाठी मुबलक ऑक्सीजन निर्मिती बरोबरच तापमान वाढ रोखण्यासाठी आपल्या नगरपालिकेच्या वतीने मोठे प्रयत्न व्हावेत . पंढरपूर शहर १० किमी परिघात पसरले आहे .
काही किमीवर अंतरावरील कबरस्थान अथवा स्मशानभुमी पर्यत चालत शव आणणे, उन, वादळ, वारा, पावसात सर्वांसाठी त्रासदायक ठरत आहे . यासाठी मयतेच्या घरापासून कबरस्थान अथवा स्मशानभुमी पर्यत पार्थीव व त्यांचे नातलगांना जाण्यासाठी आणि अंत्यविधीनंतर मृताच्या घरापर्यंत परत येण्यासाठी नाममात्र भाड्यात *खास बसची* नवीन सुविधा आपल्या नगरपालिकेच्या वतीने करावी .
पंढरपुर शहरात तीन ठिकाणी मुस्लीम समाजाची कबरस्थान आहेत . मोठी लोकसंख्या असणाऱ्या मुस्लीम समाजाच्या तिन्ही कबरस्थान मध्ये बसण्यासाठी पुरेशी व्यवस्था नाही . मयतेच्या अंत्यविधी वेळी किमान चार – पाचशे लोक कबरस्थान मध्ये येत असतात . दफनविधीचे सोपस्कर पार पडेपर्यंत दीड – दोन तासाचा वेळ जात असतो .
या दफनविधी वेळी वयस्कर, आजारी, दिव्यांग तसेच लठ्ठ माणसेही आलेली असतात . त्यावेळी यांना तास दोन तास उभे राहणे अत्यंत त्रासदायक ठरत असते . ना तिथे सावली असते, ना तिथे पिण्याच्या पाण्याची सोय असते . उन, वारा, पाऊस या वेळच्या सोपस्करावेळी हे लोक तटस्थ उभे असतात . हे लक्षात घेऊन या तिन्ही कबरस्थान मध्ये पंढरपुर शहरातील तिन्ही कबरस्थानात प्रत्येकी १० बाकडी बसवावीत . या तिन्ही कबरस्थानात पिण्याच्या पाण्यासाठी सार्वजनिक नळाची सोय केली जावी . आणि या तिन्ही कबरस्थानात किमान १०० लोकांना सावली खाली बसता यावे म्हणून २० फुट बाय १०० फुट लांबीचे सभामंडप उभे करून दिले जावे .
नगरपालिका निधीतून तसेच विधानपरिषदेचे आमदार महोदय अथवा लोकसभा, राज्यसभेचे, खासदार महोदयांच्या आमदार – खासदार फंडातून या सर्व बाबींची आपण पुर्तता करून द्यावी . अशी मागणी, मी माझे जन्मगाव असलेल्या पंढरपूर शहरातील मुस्लीम व इतर धर्मीय बांधवांसाठी करीत असल्याचे सादिक खाटीक यांनी स्पष्ट केले .
