📰 माणगंगा न्युज | विशेष वृत्त१२८ घरकुले मंजूर म्हणजे नव्या गावाची निर्मितीच!विभूतवाडीत एकाच टप्प्यात तब्बल १२८ कुटुंबांना हक्काचे घर; वर्षानुवर्षांच्या पाठपुराव्याला अखेर यश, गावात आनंदाचे वातावरण

📰 माणगंगा न्युज | विशेष वृत्त
१२८ घरकुले मंजूर म्हणजे नव्या गावाची निर्मितीच!
विभूतवाडीत एकाच टप्प्यात तब्बल १२८ कुटुंबांना हक्काचे घर; वर्षानुवर्षांच्या पाठपुराव्याला अखेर यश, गावात आनंदाचे वातावरण

आटपाडी | प्रतिनिधी

आटपाडी तालुक्यातील विभूतवाडी गावासाठी एकाच वेळी तब्बल १२८ घरकुले मंजूर झाल्याने गावाच्या विकासाच्या दृष्टीने हा महत्त्वपूर्ण टप्पा मानला जात आहे. साधारण ९० ते ११० घरांची वस्तीही स्वतंत्र गावाएवढी भासते. त्यामुळे एकाच टप्प्यात १२८ नवीन घरांची उभारणी म्हणजे जणू नव्या गावाची निर्मितीच, अशी भावना ग्रामस्थांमधून व्यक्त होत आहे.

गावातील अनेक गरीब, गरजू आणि घरकुलापासून वंचित कुटुंबांना स्वतःचे पक्के घर मिळावे यासाठी गेल्या अनेक दिवसांपासून, तर काही प्रकरणांमध्ये अनेक वर्षांपासून गावातील पदाधिकारी, कार्यकर्ते आणि संबंधित नागरिक सातत्याने पाठपुरावा करीत होते. घरकुलांचे प्रस्ताव तयार करणे, ते संबंधित कार्यालयांकडे सादर करणे आणि मंजुरीसाठी आवश्यक पाठपुरावा करणे अशी प्रक्रिया सातत्याने सुरू होती. अखेर या प्रयत्नांना यश आले असून तब्बल १२८ घरकुले मंजूर झाल्याने गावात आनंदाचे वातावरण निर्माण झाले आहे.

घरकुलापासून अनेक वर्षे वंचित राहिलेल्या कुटुंबांसाठी ही मंजुरी मोठा दिलासा देणारी ठरणार आहे. प्रत्येक कुटुंबासाठी स्वतःच्या हक्काचे घर हे आयुष्यातील मोठे स्वप्न असते. आता या मंजुरीमुळे १२८ कुटुंबांचे हे स्वप्न प्रत्यक्षात साकार होण्याचा मार्ग मोकळा झाला आहे.

१२८ घरे म्हणजे मोठी नवी वस्ती एकाचवेळी १२८ घरे उभी राहिल्यानंतर विभूतवाडीच्या लोकवस्तीचा मोठ्या प्रमाणात विस्तार होणार आहे. त्यामुळे या घरकुलांकडे केवळ स्वतंत्र घरे म्हणून न पाहता एका मोठ्या नवीन वस्तीच्या निर्मितीच्या दृष्टीने नियोजन करण्याची आवश्यकता असल्याचे मत ग्रामस्थ व्यक्त करीत आहेत. रस्ते, पाणीपुरवठा, वीज, स्ट्रीट लाईट, गटारे तसेच अन्य मूलभूत सुविधांचेही नियोजन घरकुलांच्या उभारणीसोबतच होणे गरजेचे असल्याची अपेक्षा व्यक्त होत आहे.

प्रयत्न करणाऱ्या सर्वांचे अभिनंदन

घरकुल मंजुरीसाठी ज्या-ज्या लोकप्रतिनिधींनी, पदाधिकाऱ्यांनी, कार्यकर्त्यांनी तसेच संबंधित अधिकाऱ्यांनी प्रयत्न केले, त्या सर्वांचे गावाच्या वतीने अभिनंदन करण्यात येत आहे. घरकुले मंजूर झाल्याची माहिती मिळाल्यानंतर अनेक ग्रामस्थांनी संबंधित पदाधिकारी व अधिकाऱ्यांशी दूरध्वनीवरून संपर्क साधत त्यांचे अभिनंदन केले आणि आभार मानले.

गावातील ज्येष्ठ नागरिकांनीही या यशाबद्दल समाधान व्यक्त केले आहे. “यापुढेही गावाच्या सर्वांगीण विकासासाठी अशाच पद्धतीने मोठ्या प्रमाणात निधी उपलब्ध करून आणावा,” अशा शुभेच्छा देतानाच अनेक वयोवृद्ध ग्रामस्थांनी पदाधिकारी आणि कार्यकर्त्यांना आशीर्वाद दिले आहेत.

राजकारण बाजूला ठेवून विकासासाठी एकत्र या
घरकुल मंजुरीमुळे गावात निर्माण झालेल्या आनंदाच्या वातावरणात ज्येष्ठ नागरिकांनी एक महत्त्वपूर्ण संदेशही दिला आहे. गावाच्या विकासाच्या प्रश्नावर राजकीय मतभेद बाजूला ठेवून सर्वांनी एकत्र आले पाहिजे. रस्ते, पाणी, वीज, शिक्षण, आरोग्य आणि इतर मूलभूत सुविधांसाठी सामूहिक प्रयत्न केले तर विभूतवाडीच्या विकासाला आणखी गती मिळेल, असे आवाहन ज्येष्ठ नागरिकांनी केले आहे.

“१२८ घरकुले म्हणजे केवळ १२८ इमारती नव्हेत; ती १२८ कुटुंबांच्या आयुष्यातील नव्या पर्वाची सुरुवात आहे. एकाचवेळी एवढ्या मोठ्या संख्येने घरकुले मंजूर होणे म्हणजे विभूतवाडीत एका नव्या वस्तीची, किंबहुना नव्या गावाची निर्मिती होत असल्यासारखेच आहे,” अशी भावना ग्रामस्थांमधून व्यक्त होत आहे.