आटपाडी बाजार समितीत राष्ट्रसंत तुकडोजी महाराज शेतकरी भवनाला प्रशासकीय मंजुरी… आम्. सुहास बाबर व तालुक्याचे नेते तानाजीराव पाटील यांच्या प्रयत्नाला यश…… संतोष पुजारी.२ कोटी ६८ लाख ८२ हजारांचा अंदाजित खर्च; ५५६.१२ चौ.मी. आरसीसी बांधकाम, शेतकऱ्यांसाठी मुक्कामासह विविध सुविधा एकाच छताखाली
आटपाडी | प्रतिनिधी
आटपाडी कृषी उत्पन्न बाजार समितीच्या मुख्य बाजार आवारात ‘राष्ट्रसंत तुकडोजी महाराज शेतकरी भवन’ उभारण्याच्या कामाला शासनाकडून प्रशासकीय मान्यता मिळाली आहे.
सुमारे २ कोटी ६८ लाख ८२ हजार रुपये अंदाजित खर्चाच्या या भवनाचे ५५६.१२ चौरस मीटर क्षेत्रफळात आरसीसी बांधकाम करण्यात येणार असल्याची माहिती कृषी उत्पन्न बाजार समिती, आटपाडीने प्रसिद्धीस दिलेल्या पत्रकातून दिली आहे.बाजार समितीच्या माहितीनुसार, खानापूर-आटपाडीचे आमदार सुहास (भैय्या) बाबर आणि तानाजीराव पाटील यांच्या विशेष प्रयत्नातून या कामाला शासनाची प्रशासकीय मान्यता मिळाली आहे.
आटपाडी बाजार समितीच्या मुख्य बाजार आवारात उभारण्यात येणारे हे शेतकरी भवन सर्व सोयींनी सुसज्ज असणार आहे. आटपाडी तालुक्यासह सांगली जिल्हा, राज्याच्या विविध भागांतून तसेच इतर राज्यांतून बाजार समितीत येणाऱ्या शेतकऱ्यांना मुक्कामाची चांगली सुविधा यामुळे उपलब्ध होणार आहे.मेळावे, प्रशिक्षण व मार्गदर्शनाची सुविधा…
..शेतकरी भवनामध्ये शेतकरी मेळावे, प्रशिक्षण आणि मार्गदर्शन कार्यक्रम घेण्यासाठी सुविधा उपलब्ध होणार आहेत. तसेच कृषी योजना, नवीन तंत्रज्ञानाची माहिती, शेतकरी उत्पादक गटांसाठी सुविधा आणि आधुनिक बैठक व्यवस्था उपलब्ध करून देण्याचे नियोजन आहे. शेतकरी, व्यापारी आणि कृषी विभाग यांच्यातील समन्वयासाठीही हे भवन उपयुक्त ठरणार असल्याचे बाजार समितीने म्हटले आहे.कृषी प्रदर्शन तसेच शेतकऱ्यांच्या उत्पादनांचे प्रदर्शन करण्यासाठीही येथे सुविधा उपलब्ध होणार असून, शेतकऱ्यांच्या हिताच्या विविध सेवा एकाच छताखाली देण्याचा प्रयत्न या माध्यमातून केला जाणार आहे.शेतकऱ्यांच्या मागणीला यश…
..आटपाडीच्या आठवडा बाजारात तसेच डाळिंब सौद्यासाठी येणाऱ्या शेतकऱ्यांनी मुक्कामासाठी चांगल्या शेतकरी निवासाची उभारणी करावी, अशी मागणी बाजार समितीच्या संचालक मंडळाकडे केली होती. या मागणीचा विचार करून बाजार समितीचे सभापती संतोष (भाऊ) पुजारी यांनी उपसभापती व संचालक मंडळाच्या सहकार्याने शासनाकडे वेळोवेळी पाठपुरावा केला होता.
आता शेतकरी भवनाच्या कामाला प्रशासकीय मान्यता मिळाल्याने बाजारासाठी दूरवरून येणाऱ्या शेतकऱ्यांच्या निवासाचा प्रश्न सुटण्याबरोबरच प्रशिक्षण, कृषी मार्गदर्शन आणि आधुनिक शेतीविषयक माहिती देण्यासाठी आटपाडी बाजार समितीच्या आवारात स्वतंत्र सुविधा निर्माण होणार आहे.
