वाकडी गावात अघोरी प्रकार. ? तरुणीचे कपडे पेटल्याचा दावा; नागरीक भयभीत
चाळीसगाव तालुक्यातील वाकडी गावात गेल्या महिनाभरापासून रात्री अपरात्री अघोरी कृत्य अनोळखी व्यक्तींकडून होत असल्याचे गावकर्‍यांचे म्हणणे आहे.
घराबाहेर पद्धतशीरपणे रांगोळी काढणे, जादूटोणा करणे विविध वस्तू दाखवून भीती निर्माण करण्याच्या प्रयत्न करणे, लिबूं, बाहुल्या अंगणात फेकणे असे प्रकार घडत असून शुक्रवारी एका विद्यार्र्थीनीचे कपड्यांनी अचानक पेट घेतल्याचे बोलले जाते. या प्रकारामुळे घाबरलेल्या त्या मुलीला रूग्णालयात दाखल करण्यात आले.या घटनेमुळे गावात एकच खळबळ उडाली आहे.या प्रकाराचा माहीती चाळीसगाव ग्रामीण पोलीसांना गावकर्‍यांनी दिली. घटनास्थळी सहाय्यक पोलीस निरीक्षक विजय माळी व सहकार्‍यांनी भेट देवून झाल्याप्रकाराची माहिती जाणून घेतली. हा प्रकार कुणी खेाडसाळपणातून करीत आहेत काय याचा पोलीस शोध घेत आहे.
ग्रामस्थांनी दिलेल्या माहितीनुसार वाकडी गावात गेल्या महिनाभरापासून काही अज्ञात व्यक्तींकडून विशिष्ट घरांना लक्ष्य करून रात्रीच्या वेळी घरासमोर विचित्र पद्धतीने रांगोळी काढणे तसेच लिंबू, बाहुल्या आणि इतर पूजेच्या वस्तू ठेवून कुटुंबाला मानसिक त्रास दिला जात आहे.हा प्रकार कोण करीत आहेत हे समोर येत नसल्याने गावकर्‍यांमध्ये भीतीचे वातावरण आहे. हा प्रकार सुरू असतानाच शुक्रवारी दुपारच्या सुमारास एका शाळकरी विद्यार्थीनीच्या अंगावरील कपड्यांनी अचानक पेट घेतल्याचे समोर आले
. ही विद्यार्थिनी किरकोळ जखमी झाली आहे. तिला तातडीने उपचारासाठी दाखल करण्यात आले होते.या घटनेनंतर संतप्त ग्रामस्थांनी एकत्र येत चाळीसगाव ग्रामीण पोलीस ठाणे गाठले व या अघोरी कृत्यामागे असलेल्या समाजकंटकांचा शोध घेऊन त्यांच्यावर गुन्हा दाखल करून सखोल तपास करण्याची मागणी केली.या घटनेनंतर सहाय्यक पोलीस निरीक्षक योगेश माळी व सहकार्‍यांनी दोन दिवस वाकडी गावात भेट देत गावकर्‍यांकडून होणार्‍या प्रकाराबाबत माहीती जाणून घेतली.
गेल्या महिन्याभरापासून या होणार्‍या अघोरी प्रकारामुळे गावात भीतीचे वातावरण आहे. विशेषतः लहान मुले आणि महिलांमध्ये घबराट पसरली आहे. अशा घटनांमागेे नेमका कोणाचा हात आहे? हा वादातून सुरू असलेला प्रकार आहे की अंधश्रद्धेतून हे कृत्य केले जात आहे? असे प्रश्‍न उपस्थित झाले असून अघोरी कृत्य करून गावात भीतीचे व दहशतीचे वातावरण निर्माण करणार्‍यांचा त्वरीत शोध घेऊन कारवाईची मागणी ग्रामस्थांनी केली आहे.
