मराठवाडा लोक विकास मंचाच्या वतीने सामाजिक क्षेत्रात उल्लेखनीय कार्य करणऱ्या सामाजिक कार्यकर्त्यांना पुरस्कार दिले जातात. हे 12 वे वर्ष असून या वर्षी संजय ज्ञानोबा शिंदे सचिव हिंद संस्था नेकनूर यांची निवड करण्यात आलेली आहे. दिनांक 10 डिसेंबर रोजी मानवी हक्क दिना निमित्त पुरस्काराचे वितरण होणार आहे. शिंदे यांना यापूर्वी महाराष्ट्र शासन, दूरदर्शन सह्याद्री, नेहरू यावा केंद्र तसेच विविध सामजिक संस्थांनी सन्मानित केलेले आहे.
समाजकार्याची पदवीत्तर पदवी घेऊन महाराष्ट्रतील 18 जिल्ह्यात मागील 20 वर्षापासून शेती, शेतकरी, पाणी आणि महिला सक्षमीकरण यासाठी मोलाचे योगदान दिलेले आहे. त्यांचे विशेष कार्य म्हणजे जल व्यावस्थापन असून त्यामाध्यमातून पाणलोट क्षेत्र विकास कार्यक्रम, जलयुक्त शिवार अभियान, एकात्मिक पाणलोट व्यवस्थापन कार्यक्रम, सूक्ष्म सिंचन आणि शेतकऱ्यांना शासनाच्या विविध योजनांशी जोडण्याचे कार्य केलेले आहे.
त्यांच्या कार्याचे खास वैशिष्ट्य म्हणजे गावात राहून गावकऱ्यांशी सल्लामसलत करून गावच्या समस्या सोडविण्यासाठी योग्य नियोजनातून राबवितात. तसेच ते नियमित लिखाण आणि मुलाखतीद्वारे समाज माध्यम, वृत्तपत्र, दूर चित्रवाहिनी मध्यामातून लोकजागृती कार्य करतात. मराठवाडा लोकविकास मंच त्यांच्या कार्याचा सन्मान करत असल्याने सर्वत्र कौतुक होत आहे.
