दिवाळी सुरू झाली तरी आनंदाचा शिधा मिळेना ;
त-हाडी परिसरातील नागरिक आनंदाचा शिधेपासून वंचित
त-हाडी प्रतिनिधी : वाढत्या महागाईच्या पार्श्वभूमीवर राज्य सरकारने १०० रुपयांत आनंदाचा शिधा वितरित करण्याचा निर्णय घेतला. मात्र दिवाळी सण सुरू झाला तरी शिरपूर तालुक्यातील त-हाडी , वरुळ भटाणे जवखेडा नवेलोढरे जुने लोढरे त-हाडकसबे जळोद ममाणे अभानपुरसह सह काही गावातील राशन दुकानात आनंदाचा शिधा उपलब्ध न झाल्याने राशन कार्ड धारकांकडून तीव्र संताप व्यक्त केला जात आहे.
वाढती महागाई लक्षात घेऊन जनसामान्यांना दिवाळी साजरा करता यावी यासाठी दिवाळी फराळाचे साहित्य रास्त भाव दुकानांमधून देण्याचा निर्णय राज्य सरकारने घेतला. साखर, रवा, चणाडाळ आणि पामतेल असा शिधा या योजनेतून फक्त शंभर रुपयात उपलब्ध करून दिला जाणार आहे. त्यामुळे या उपक्रमाला आनंदाचा शिधा असे नाव देण्यात आले आहे. मोठा गाजावाजा करून राज्य सरकारने या योजनेची घोषणा केली होती.
मात्र दिवाळी सुरू झाली तरी आनंदाचा शिधा सर्वसामान्यांच्या घरात पोहोचू शकलेला नाही. त्यामुळे जनसामान्यांना शिधा मिळणार कधी आणि त्यांचा फराळ होणार कधी असा प्रश्न पडला आहे.
दरम्यान खुल्या बाजारात एक किलो चणाडाळ ६० ते ८० रुपयाला मिळते आहे. रव्यासाठी एक किलोला ३६ ते ५० रुपये मोजावे लागत आहेत. तर साखर ४० ते ४४ रुपये, पामतेल शंभर रुपये किलोने मिळत आहे. हा शिधा सुमारे तीनशे रुपयाचा हा शिधा पुरवठा विभागाकडून शंभर रुपयांत मिळणार आहे. त्यामुळे सर्वानाच या शिध्याची आस होती. दिवाळी सुरु झाली तरी शिरपूर तालुक्यातील बहुतांश गावात शिधा रास्त भाव दुकानांवर अद्याप पोहचू शकलेला नाही.
