आदर्श महाविद्यालयाचे प्रा. डॉ. निवास वरेकर यांची शिवाजी विद्यापीठाच्या सिनेटवर निवड
विटा ता.खानापूर येथील आदर्श महाविद्यालयातील इतिहास विभागप्रमुख व शिवाजी विद्यापीठ इतिहास अभ्यास मंडळाचे सदस्य प्रा. डॉ. निवास वरेकर यांची शिवाजी विद्यापीठाच्या सिनेटवर निवड झाली. नुकत्याच पार पडलेल्या विद्यापीठाच्या सिनेटच्या निवडणूकीमध्ये ते शिवाजी विद्यापीठ प्राध्यापक संघटना (सुटा) कडून प्राध्यापक गटातून खुल्या प्रवर्गातून निवडणूकीसाठी उभे होते.
ते चांगल्या मताधिक्याने निवडणूक जिंकले आहेत. या निवडणुकीत सुटाने आपल्या सिनेट तसेच विद्यापरिषदेच्या जागांवर घवघवीत यश संपादन केले.
प्रा. डाॅ.निवास वरेकर हे विद्यार्थीप्रिय तसेच अभ्यासू प्राध्यापक म्हणून त्यांची शिवाजी विद्यापीठ कार्यक्षेत्रात ओळख आहे.त्यांच्या रुपाने प्राध्यापक संघटनेला एक धडाडीचा नवीन चेहरा मिळाला आहे.
किल्ले जतन व संवर्धन, ऐतिहासिक पर्यटन, नागरीकरण या विविध विषयांवर ते अभ्यासक म्हणून परिचित आहेत. राजकीय तसेच सामाजिक प्रश्नांवर ते भाष्य तसेच लेखन करीत असतात. राष्ट्रीय, आंतरराष्ट्रीय दर्जेदार मासिकांमध्ये त्यांचे तीसपेक्षा जास्त शोधनिबंध प्रकाशित झाले आहेत. चार ग्रंथलेखन केले आहेत.त्याच बरोबर एक उत्कृष्ट खेळाडू म्हणून ही महाविद्यालयीन पातळीवर त्यांचा नावलौकिक होता.
अशा एका चांगल्या अष्टपैलू प्राध्यापकाची निवड सिनेटवर झाल्यामुळे शिक्षणक्षेत्रातून आनंद व्यक्त केला जात आहे.
त्यांच्या या निवडीबद्दल संस्थेचे संस्थापक अध्यक्ष माजी आमदार अँड. सदाशिवराव पाटील, संस्थेचे अध्यक्ष माजी नगराध्यक्ष अँड. वैभव पाटील, कार्यकारी संचालक पी. टी. पाटील, प्राचार्य डॉ.भाऊसाहेब कोरे तसेच महाविद्यालयातील सर्व प्राध्यापक, शिक्षकेत्तर कर्मचारी, विद्यार्थ्यांनी अभिनंदन केले.
