महागाईवर मात करुन शिरपूर तालुक्यात लग्नपत्रिका छपाईकडे अनेकांचा कल मानपान जपण्यासाठी महागाईची झळ सोसण्याची तयारी
” डिजिटल पत्रिकेचाही पर्याय“
त-हाडी प्रतिनिधी
शिरपूर तालुक्यात व त-हाडी परिसरात यावर्षी कोरोनानंतर लग्नपत्रिकेला मागणी असताना मोठ्या प्रमाणावर लग्न पत्रिका छपाईचे दर मात्र वाढले आहेत. ज्यांचे बजेट कमी आहे ते आता ‘डिजिटल पत्रिकेचा पर्याय वापरताना दिसत आहेत. असे असले तरी गेली दोन वर्षे रडत खडत सुरू असलेला लग्नपत्रिका छपाईचा व्यवसाय तेजीत असल्याचे व्यावसायिकांचे म्हणणे आहे. कागदाचे आणि इतर साहित्याचे भाव वाढल्याने लग्नपत्रिकेच्या खर्चात २५ ते ३० टक्के वाढ झाली आहे. विशेष बाब म्हणजे लॉकडाऊन काळात लग्नपत्रिका खरेदीचा आकडा जेमतेम होता. आता मात्र त्यात मोठी भर पडल्याने व्यापारी वर्गही सुखावला अधिकाधिक आहे. लग्नपत्रिका आकर्षक करण्यावर भर दिला जात आहे.
तुळशी विवाह होताच लग्नपत्रिका छपाईचा व्यवसाय तेजीत असल्याचे विक्रेत्यांकडून सांगण्यात आले आहे. कागदाचे दर वाढले आहेत. दिल्ली, पुणे, मुंबई, अहमदाबाद, राजकोट, इंदौर औरंगाबाद सारख्या प्रमुख शहरातून प्रामुख्याने लग्नपत्रिका खरेदी केली जाते. लग्नाचे निमंत्रण देण्यासाठी सोशलमीडियाचाही उपयोग केला जात आहे. मात्र, मानपानालाही अधिक महत्त्व असल्याने पत्रिका दिली तरच लग्नाला जायचं अशीही अनेकांची भावना असते. त्याअनुषंगाने छपाईची पत्रिका महत्त्वाची ठरत आहे.
