कपाशी, तूर, मकाचे बियाणे महागले; सोयाबीन झाले स्वस्त….
त-हाडी :-जून महिन्याला सुरुवात झाल्याने शेतकऱ्यांची खरिपाची लगबग सुरू झाली आहे. यावर्षी कपाशी व तुरीच्या बियाण्यांचे दर १००-१५० रुपयांनी वाढल्याने शेतकऱ्यांच्या अडचणींमध्ये वाढ झाली आहे. तर सोयाबीन बियाणे गतवर्षीच्या तुलनेत स्वस्त झाल्याने दिलासा मिळाला आहे.
गतवर्षी खरीप व रब्बी दोन्ही हंगामात निसर्गाने शेतकऱ्यांवर अवकृपा दाखवली. खरिपात अतिपावसामुळे उडीद, मूग मातीमोल झाले. कपाशी पिकांना मोठा फटका बसला. त्यामुळे उत्पन्नात मोठी घट झाली. त्यात रब्बी हंगामात काही प्रमाणात अपेक्षा होती; मात्र अवकाळी पावसाने कांदा, तूर, हरभरा,गहू फळपिके नेस्तनाबूत झाली.
या संकटातून पुन्हा उभारी घेत पैशांची “जुळवाजुळव करत शेतकऱ्यांनी खरिपाची तयारी सुरू केली आहे; मात्र हंगामाच्या सुरुवातीलाच शेतकऱ्यांना बियाण्यांच्या दरवाढीचा शॉक बसला आहे. त्यामुळे शेतकऱ्यांच्या अडचणी आणखी वाढल्या आहेत.
बियाणांचे दर गतवर्षीचे दर सध्याचे दर
बीटी (४७५ ग्रॅम) ७२०-७५० रुपये ८५०-८५३ रुपये
तूर (१ किलो) १५०-२५० रुपये ३००-३५० रुपये
मका (४ किलो), १४००-१४६० रुपये १६००-१६५० रुपये
सोयाबीन (एक बॅग) ३२००-३९०० रुपये २२००-२८०० रुपये
शेतकऱ्यांनी तयारी केली सुरु
यावर्षी खरिप हंगामात पेरणी करून नुकसान भरून निघणार, या आशेनेच शेतकऱ्यांनी सध्या तयारी सुरु केली आहे.
मात्र बँकांकडून शेतकऱ्यांना पीक कर्ज मिळण्यास अडचणी येत आहेत. त्यामुळे शेतकऱ्यांना बँकांमध्ये चकरा माराव्या लागत आहेत.
