..
शिरपूर तालुक्यात “इमर्जन्सी लोडशेडींग”ला सुरुवात
विजेचा वापर काटकसरीने करा; दिनेश माळी उपकार्यकारी अभियंता
त-हाडी प्रतिनिधी
शिरपूर तालुक्यात व त-हाडी परिसरात यंदा गेल्या महिनाभरापासून धुळेसह राज्यभरात पावसाने दडी मारली आहे. याचा राज्यभरातील वीजनिर्मिती करणाऱ्या औष्णिक विद्युत प्रकल्पांवर परिणाम झाला आहे. मागणी आणि पुरवठ्यात तफावत झाल्यामुळे, महावितरणच्या संपूर्ण महाराष्ट्रात त्याप्रमाणेच धुळे व दोंडाईचा, शिरपूर व साक्री परिमंडळात गेल्या दोन ते तीन दिवसांपासून ‘इमर्जन्सी लोडशेडिंगला सुरुवात झाली आहे.
त्यामुळे कुठे अर्धा तास तर कुठे एक तास तर कोठे तीन तास वीजपुरवठा वरिष्ठ कार्यालयाकडून फोन किंवा मेसेज आला की बंद ठेवावा लागत असल्याचे वरुळ महावितरणचे कनिष्ठ अभियंता माळी यांच्या कडून सांगण्यात आले.महावितरणने दिलेल्या माहितीनुसार, सध्या राज्याची १८ ते २६ हजार मेगावॅट विजेची मागणी आहे. पावसाळ्यात पहाटे ६ ते सकाळी १० आणि सायंकाळी ६ ते रात्री १० या वेळेत विजेची मागणी सर्वाधिक असते. मात्र, वरुणराजाने चांगलीच दडी मारल्यामुळे, वीजनिर्मिती केंद्रांवर पाण्याअभावी परिणाम झाला आहे. त्यामुळे मागणीपेक्षा ५०० ते एक हजार मेगावॅटचा तुटवडा महावितरणला जाणवत आहे.
विशेष म्हणजे राज्यातील सात ठिकाणच्या औष्णिक विद्युत प्रकल्पांव्यतिरिक्त महावितरणतर्फे काही खासगी कंपन्यांतर्फे वीज खरेदी करण्यात येते. मात्र, तरीदेखील तुटवडा असल्याने महावितरणला सर्वाधिक मागणीच्या वेळेला इमर्जन्सी लोडशेडिंग करावे लागत आहे.
▪️”””अत्यल्प पावसाचा परिणाम वीजनिर्मितीवरही झाला आहे. त्यामुळे वरिष्ठ कार्यालयाच्या सूचनेनुसार, शिरपूर परिमंडळात तात्पुरते इमर्जन्सी लोडशेडिंग आम्हाला करावे लागत आहे. हे लोडसेडिंग धुळे परिमंडळातच नाही तर राज्यातील बहुतांश भागातही होत आहे.
-उपकार्यकारी अभियंता दिनेश माळी, वरूळ महावितरण
