“वरूळ परिसर बनतोय..वांगे पिकाचा हब.”
‘अंतुली येथील जवळपास शेतकऱ्यांच्या शेतात वांग्याची लागवड.’
“वरुळ भटाणे नवे -जुने लोढरे नवे -जुने अंतुली येथेही लागवड वाढली.”
त-हाडी :दि.१९
तालुक्यातील वरुळ परिसरातील शेतकऱ्यांचे मुख्य पीक जरी कपाशी असले तरी कपाशी या पिकावर वाढता रोगाचा प्रादुर्भाव सोबतच उत्पादन खर्चाच्या मानाने मिळत नसलेले भाव यामुळे या परिसरातील शेतकऱ्यांनी इतर पिकाकडे आपला मोर्चा वळवला असून कमी क्षेत्रात अधिकचा नफा मिळविणाऱ्या हिरवे वांगे या पिकाला जवळ केल्याचे सद्या दिसून येत आहे.या परिसरातील वरूळ, भटाणे, नवे -जुने लोढरे नवे -जुने अंतुली या गावातील अनेक शेतकऱ्यांनी उन्हाळ्याच्या उत्तरार्धात या पिकाची लागवड करून लाखो रुपयांचे उत्पादन घेत आपल्या आर्थिक प्रगतीचा मार्ग सुकर केला आहे.
आजरोजी या भागातून जवळपास २ हजार ते ५ हजार क्विंटलचे हिरवे वांगे(भरिताचे) वेगवेगळ्या मार्केटमध्ये रोज ते पण जागेवरून खरेदी करून रवाना होत आहेत.यासाठी या परिसरातील शेतकऱ्यांनी व्हाट्सअप्प ग्रुपच्या माध्यमातून बाजारभाव व इतर वेगवेगळ्या माहितीसाठी संवादाचे दालन उभे केले आहे.एकप्रकारे वांगे पिकाचा हब येथे तयार होत असून त्यातून शेतकरी प्रगती साधत आहेत.
मध्ये प्रदेश गुजरात राज्य,आणि खान्देशच्या सीमेवर मोडणाऱ्या शिरपुर तालुक्याच्या वरुळ परिसरातील या गावांना कॉटनबेल्टची किनार लाभली आहे.परंतु ते पीक सद्या परवडत नसल्याने शेतकऱ्यांनी इतर पिकांकडे आपला कल ओढविला आहे.गेल्या २/३ वर्षांपासून येथील काही शेतकऱ्यांनी वांगे पिकाला प्राधान्य दिले आहे.अंकुर सिड्सचे विनायक, निर्मल -१२२४ या वाणाची यासाठी निवड केली जात असून एका एकरात लाखो रुपयांचे उत्पादन यातून घेतले जात आहे.वांगे(हिरवे)या पिकाची लागवड १५ मे नंतर हे शेतकरी करत असून ठिबकसिंचनवर ४ बाय २ च्या ओळीवर याची लागवड करून योग्य वेळी फवारणी व खताची मात्रा देऊन एका एकरात लाखोंचे उत्पादन यातून घेतले जात आहे.
नवे -जुने लोढरे नवे -जुने अंतुली येथील जवळपास शेतकऱ्यांच्या शेतात भरिताचे हिरवे वांगे पेरलेले असून हे वांगे सुरत, बडोदा, पुणे , नाशिक, इंदोर , मुंबई तसेच महाराष्ट्रातील जवळपास सर्व जिल्ह्यात विक्रीला जात आहेत.हा माल जास्त राहत असल्यामुळे दुरदूरचे व्यापारी जागेवरूनच वांग्याची खरेदी करतात.सद्या या पिकाला नगण्य असा केवळ ७ रु.प्रति किलोचा भाव मिळत असून काही वेळेस ४० रु प्रति किलोने हे वांगे विकल्या गेल्याचे शेतकरी सांगत आहेत.
” मी गेल्या तीन वर्षांपासून या पिकाकडे वळलो असून यावर्षी माझ्या १ एकर क्षेत्रात मी निर्मल १२२४ हे वांग्याचे वाण जून महिन्यात पेरले आहे.लागवडीनंतर एक ते दीड महिन्यात माल सुरू होत असल्याने आतापर्यंत मी दोन लाख रुपयांचे वांगे विकले असून त्यासाठी ७० हजार रुपये निव्वळ खर्च लागला आहे.मी माझ्या एका तोडणीतून १८० ते २३० पंनी(१५ किलोची बॅग)वांगे काढले होते.कधी कमी तर कधी भरपूर असे याचे प्रमाण राहत असून प्रति पंनी जास्तीत जास्त ३०० रुपये तर कमीतकमी १०० रुपये चे भाव मला मिळाले आहेत.हे पीक डिसेंबरमध्ये उपटून टाकल्यानंतर मी रब्बीचा मका पण यात घेतो.”
-किशोर सोमा
कोळी ,शेतकरी,
नवे -अंतुली ता शिरपूर जि धुळे
फोटो – शिरपूर तालुक्यातील नवे अंतुली येथील शेतकरी किशोर कोळी एका ठिकाणी गोळा करताना व वांगी पंनी भरतांना महिला
