बेमोसमी लगातार दोन दिवसाच्या पावसाने शेती पिकांचे नुकसान.!
‘कापूस पीक काळवंडले,तुरीची फुलगळ.
वरुळ :- शिरपूर तालुक्यामध्ये खरीप हंगामात लागवड केलेल्या पिकावर शेवटीशेवटी परतीच्या पावसाने पाठ फिरवील्याने सर्वच पिकाचे उत्पन्न घटले आहे.थोड्याफार प्रमाणात ठिबक सिंचनवर आलेले कपाशीचे पीक हे आता वेचणीत असतांना बेमोसमी दि.२६ व २७ रोजी रात्री झालेल्या जोरदार पावसामुळे या कपाशीच्या बोंडांची दाणादाण होऊन त्याच्या वाती झाल्या आहे.परिणामी कापूस पीक काळवंटला असून बाजार भावातही कापूस पीक मार खाणार आहे.सोबतच तूर पीक फुलोऱ्यात असतांना फुलगळ मोठ्या प्रमाणात झाली आहे.त्यामुळे शेतकरी पुन्हा आर्थिक संकटात सापडला आहे.
शिरपूर तालुक्यात यावर्षी पावसाचे प्रमाण कमी अधिक राहिल्यामुळे खरिपातील पिके खराब होऊन त्याची वाढही खुंटलेली होती.त्याचा सर्वाधिक फटका कोरडवाहू कपाशीला बसला असून या कपाशीची वाढ घटल्यामुळे कमी उंचीतच कपाशीची बोंडे फुटायला सुरुवात झाली. त्यामुळे उत्पन्नात सुमारे ५० टक्के घट झाल्याचे स्पष्ट झाले आहे. मात्र रविवारी व सोमवारी रात्री पडलेल्या पावसामुळे खरिपात लागवड केलेल्या कपाशीच्या बोंडांची दाणादान झाली आहे. परिणामी कापूस पीक काळवंडून गेले आहे. त्यामुळे अगोदर निसर्गाने मारले अन् आता बेमोसमी पावसाने मारल्याने शेतकऱ्यांना मोठा आर्थिक फटका बसला आहे.कपाशी पिकावर झालेल्या खर्चही आता निघणे अवघड झाले असून पुन्हा कर्जाच्या खाईत शेतकरी ओढला जाऊ लागला आहे. त्यामुळे शासनाने शिरपूर तालुक्यातील शेतकऱ्यांना अवकाळी साठी निधी उपलब्ध करून द्यावा, अशी मागणी शेतकऱ्यातून होऊ लागली आहे.
…..
- …पुन्हा कर्जाचा डोंगर वाढणार •
मागील गेल्या तीन-चार वर्षांपासून सातत्याने शेतकऱ्यांच्या पाठीशी एकापाठोपाठ एक संकट सुरू आहे. कधी ओला दुष्काळ तर कधी कोरडा दुष्काळ आणि आता बेमोसमी पाऊस पडल्यामुळे शेतकऱ्यांच्या डोक्यावरील कर्जाचा डोंगर पुन्हा वाढणार असल्याची शक्यता निर्माण झाली आहे. खरिपात लागवड केलेल्या पिकाचा खर्चही निघणे अवघड झाल्याने शेतकरी आर्थिक कोंडीत सापडला आहे.
… - अन् शेतकऱ्यांच्या उन्नतीची चाके थांबली •
शेतकऱ्यांना वर्षभर शेतात राबवून पिकवलेल्या पिकावरच आर्थिक उन्नती साधता येते. त्याचबरोबर शेतीला जोडधंदा म्हणून दुग्ध व्यवसाय अनेक शेतकरी करतात. परंतु सतत निसर्गाची अवकृपा राहत असल्यामुळे चारा टंचाईसह खरीपातील पिकेही वाया गेल्यामुळे शेतकऱ्यांच्या उन्नतीची चाके जागेवरच थांबली असल्याचे चित्र दिसून येऊ लागले आहे.
