कार्यकारी अभियंता इंजी.सचिन पवार, यांना उत्कृष्ठ अभियंता पुरस्कार जाहीर…
आटपाडी प्रतिनिधी
जलसंपदा विभागातील अभियांत्रिकी सेवेतील उत्कृष्ठ अभियंत्यांना सन 2020 या वर्षाकरिता वैयक्तिक व सांघिक पुरस्कार कार्यकारी अभियंता इंजिनीयर सचिन पवार यांना पुरस्कार जाहीर झाला आहे. पुरस्कार जाहीर होतात त्यांच्यावर शुभेच्छांचा वर्षाव विविध क्षेत्रातून होत आहे.
शासनाने दि. 05/12/2023 रोजी पुरस्कार जाहीर केले असून कार्यकारी अभियंता गटामध्ये इंजि. सचिन कुंडलिक पवार यांची वैयक्तिक पुरस्कारासाठी निवड झाली आहे. तसेच सन 2019 चा सांघिक पुरस्कार सांगली पाटबंधारे मंडळास जाहीर झाला असून त्यामध्येही त्यांचा समावेश आहे.
कार्यकारी अभियंता इंजिनीयर सचिन पवार हे सध्या म्हैसाळ पंपगृह विभाग क्र.2, सांगली या विभागात कार्यकारी अभियंता या पदावर कार्यरत आहेत. त्यांनी स्थपत्य अभियांत्रिकी पदवी संपादन करून भारतीय तंत्रज्ञान संस्था(आयटीआय) दिल्ली येथे पदव्युत्तर शिक्षण घेत असतानाच महाराष्ट्र लोकसेवा आयोगाच्या अभियांत्रिकी सेवा स्पर्धा परीक्षेत यश मिळवून जलसंपदा खात्यात आपल्या कारकिर्दीस सहाय्यक अभियंता श्रेणी-2 या पदावर सुरूवात केली होती.
त्यानंतर पदोन्नत होऊन कार्यकारी अभियंता या पदावर 12 वर्षांपासून ते कार्यरत असून ताकारी, म्हैसाळ व टेंभू या तीनही उपसा सिंचन योजना व ल.पा.तालांवाची कामे यामध्ये त्यांनी महत्वपूर्ण व उल्लेखनीय कामगिरी केली आहे.
टेंभू प्रकल्पांतर्गत सांगोला कालवा किमी 19 ते 50 हा टप्पा सन 2018-19 मध्ये पूर्ण करून शासन धोरणानुसार बंदिस्त नलिका वितरण प्रणालीद्वारे लाभक्षेत्र विकसित करण्याचे काम व विसापूर, पुणदी उपसा योजनांवरील लाभक्षेत्रामध्ये बंदिस्त नलिका वितरण प्रणाली राबवून 11000 हे. वरील लाभक्षेत्र विकसन, अभियांत्रिकी संकल्पचित्रे तयार करणे, टेंभू प्रकल्पांतर्गतची 80% भूसंपादन प्रकरणे मार्गी लावणे,आटपाडी तालुक्यातील महाडिकवाडी ल.पा.प्रकल्पातील 10 वर्षापासून प्रलंबित कामे मार्गी लावून प्रकल्प पूर्ण करणे, अंकलगी व भिवर्गी ल.पा.तलाव बुडित क्षेत्रातील 60 न्यायालयीन प्रकरणे लोक न्यायालयात मार्गी लावणे अशी उल्लेखनीय कामे त्यांनी केली आहेत.
उपसा सिंचन योजना, कालवे व बंदिस्त नलिका वितरण व्यवस्था व भूसंपादन यामध्ये त्यांनी वैशिष्ट्यपूर्ण कामे केली आहेत.
याशिवाय मैदानी खेळांमध्ये त्यांना विशेष रुची असून खात्यांतर्गत व्हॉलीबॉल, कबड्डी, क्रिकेट इ. खेळांसाठी समन्वयक म्हणून काम केले असून वैयक्तिक कामगिरीमध्ये सन 2022 मध्ये गोवा येथे आयोजित ट्रेथलॉनमध्ये आयर्न मॅन (लोहपुरूष) हा किताब मिळवला आहे. व अनेक मॅरेथॉनमध्ये स्वत:सह अनेकांना भाग घेणेस प्रोत्साहित केले आहे. सामाजिक क्षेत्रामध्येही त्यांनी भरीव योगदान दिले आहे.
वरील पुरस्काराचे श्रेय त्यांचे सहकर्मी, वरिष्ठ अधिकारी तसेच समाजातील विविध स्तरातील लोक, लोक प्रतिनिधी तसेच लाभधारक शेतकरी यांचे असल्याचे त्यांनी कृतज्ञतापूर्वक नमूद करून आभार मानले. त्यांना पुरस्कार मिळाल्यावर योग्य अभियंत्याचा उचित सन्मान झाल्याची भावना सर्व स्तरातून व्यक्त होत आहे.
