हिंद संस्थेच्या पुढाकाराने विभागीय व जिल्हा पशुसंवर्धन अधिकारी पशुपालकांच्या भेटीला
नेकनूर प्रतिनिधी…
विभागीय अधिकारी आणि जिल्हा पशुसंवर्धन अधिकारी यांची टीम नेकनूर व परिसरातील शेळीपालन व कुटकुटपालन भेटीसाठी आली होती. यामध्ये डॉ. संजय गायकवाड, सहा. आयुक्त, प्रादेशिक पशुसंवर्धन अधिकारी, औरंगाबाद, डॉ. प्रशांत चौधरी, सहा आयुक्त, पशुसंवर्धन विभागीय रोग अन्वेषण प्रयोग शाळा औरंगाबाद, डॉ. वल्लभ जोशी, सहा. आयुक्त, पशूसंवर्धन पशू वैद्यकीय सर्व चिकित्सालय औरंगाबाद, डॉ.प्रदीप झोड, उप आयुक्त, जिल्हा पशुसंवर्धन औरंगाबाद, डॉ. बोयळ, उप आयुक्त जिल्हा पशुसंवर्धन बीड, डॉ. विजय देशमुख, जिल्हा पशुसंवर्धन अधिकारी बीड, डॉ. रमाकांत सितळे, सहा. पशुधन विकास अधिकारी, सहा. आयुक्त प्रादेशिक पशुसंवर्धन कार्यालय औरंगाबाद, डॉ. मधुकर मंगरुळकर, सहा. पशुधन विकास अधिकारी, सहा. आयुक्त प्रादेशिक पशुसंवर्धन कार्यालय औरंगाबाद, डॉ. आसाराम काळे, पशुधन विकास अधिकारी नेकनूर, आदि अधिकारी एकत्रित होते. यांनी प्रथम हिंद संस्था कार्यालयास भेट दिली.
यावेळी संस्थेचे सचिव संजय शिंदे यांनी संस्थेच्या कार्याची माहिती दिली. नंतर हिंद शेतकरी गटासोबत डॉ. सितळे यांनी चर्चा करतांना सांगितले की, जनावरांना लसीकरण करण्यासाठी संस्थेने आपल्या कार्यक्षेत्रातील गावात जागृतीचे काम करावे म्हणजे पशू संवर्धनासाठी मोठी मदत होईल. सर्व अधिकारी यांनी कुंभारी येथील शेतकरी वसंत शिंदे यांच्या बंदीस्त शेळीपालन शेडला भेट दिली. शिंदे हे निवृत्त शिक्षक असून मागील ८ वर्षापासून हा व्यवसाय करत आहेत.
त्यांनी सांगितले की, एक वर्षाला एक शेतीपासून कमीत कमी १२ हजार रुपये नफा मिळतो. त्यांच्याकडे सर्व शेळ्या या बोअर जातीच्या आहेत. त्यांचे एक बोकड २४ हजार रुपया पर्यंत विकलेले आहे. आज त्यांच्याकडे लहान मोठ्या ४० शेळ्या आहेत.
वर्षा कमीत कमी सर्व खर्च वजा जाता ३ ते ४ लाख रुपये उत्पन्न होते. यावर आणखी उत्पादन कसे वाढवता येईल यासाठी नवीन गवत, तुती लागवड, अहार आणि बाजार याचे नियोजन कसे असावे याविषयी डॉ. संजय गायकवाड यांनी माहिती दिली. पुढे नेकनूर येथील शेतकरी मुकुंद काळे, बिबिषण बापू शिंदे व राजेंद्र शिंदे यांच्या बंदीस्त शेळीपालन शेडला भेट दिली. यावेळी बिबिषण शिंदे यांनी सांगितले की, मी नेकनूर बाजार व परिसरातून सहा शेळ्या विकत घेवून सुरुवात केली. एका वर्षात मी १२ बोकड विकून लहान मोठ्या २२ शेळ्या आहेत.
मला पहिल्या वर्षात सर्व खर्च जाता ५० हजार रुपये नफा झाला. डॉ. मधुकर मंगरुळकर यांनी सांगितले की, तुमच्या कडे नेकनूर परिसरातील ब्लॅकगोल्ड शेळी आहे. ती उंच, मोठी, वजनदार, कमीत कमी दोन पिल्ले देणारी आणि अजाराला बळी न पडणारी शेळी आहे. तिचा सांभाळ केला तर आणखी उत्पादन वाढेल. क्रॉस ब्रेडला कमी महत्व देवून स्थानिक शेळीला जास्त महत्व दिले तर अधिक उत्पादन मिळते व मर किंवा इतर रोग आणि खर्च कमी येतो. या विषयातील तीन दिवसाचे प्रशिक्षण आणि मार्गदर्शन शेतकऱ्यांना वेळोवेळी केले जाईल असे सांगितले.
