असली-भोरखेडा परिसरात बेसुमार वृक्षांची कत्तल,वन विभागाचे साफ दुर्लक्ष
सातपुडा संवर्धन समितीच्या पदाधिकाऱ्यांनी वृक्षतोड आणली उघडकीस
वन जमीनसाठी अज्ञाताकडून 5 ते 7 वर्ष वयाच्या झाडांची बेसुमार कत्तल
त-हाडी (प्रतिनिधी)
तालुक्यात सातपुडा पर्वत रांगेत वन जमीनीवर अतिक्रमण करण्यासाठी काही अज्ञातांकडून बेसुमार वृक्षतोड होत असल्याचे शुक्रवारी पुन्हा उघडकीस आले आहे.शिरपूर तालुक्यातील असली भोरखेडा परिसरात सातपुडा संवर्धन समितीच्या पदाधिकाऱ्यांनी सदर प्रकार उघडकीस आणला आहे. वनविभागास माहिती मिळाल्यावर वन कर्मचारी घटनास्थळी दाखल झाले.
एकीकडे शासनाकडून मोठ्या प्रमाणावर ‘झाडे लावा झाडे जगवा’ मोहीम सर्वत्र राबविली जात असतांना शिरपूर तालुक्यातील सातपुडा पर्वत रांगेत वन जमीनीवर अतिक्रमण करण्यासाठी गेल्या काही दिवसांपासून असली भोरखेडा परिसरातील मोठ्या प्रमाणावर वृक्षतोड होत आहे.काही अज्ञात व्यक्तींकडून रात्री अपरात्री असली परिसरात वृक्षांची कत्तल केली जात आहे.
तालुक्यातील असली येथील सातपुडा संवर्धन समितीचे अध्यक्ष राहुल ईशी,किरण कोळी, प्रशांत कोळी, कुलदिप ईशी, सुनील वाघ,मयुर कोळी, संजय कोळी,विकास कोळी, यांनी वनपाल मुकेश गुजर यांच्या सोबत तसेच भोरखेडा वन समितीचे अध्यक्ष भुपेंन्द्र राजपूत यांनी शुक्रवारी सातपुडा पर्वताच्या पायथ्याशी पाच वर्षापूर्वी वृक्षारोपण करण्यात आलेल्या जागेवर जाऊन पाहणी केली असता डेरेदार वृक्ष तोडून फेकण्यात आलेले दिसून आले काहीं ठिकाणी शेती तयार करण्यासाठी जागा साफ केलेली आढळून आली आहे.
सदर प्रकार उघडकीस आल्यावर वन विभाग काय कार्यवाही करते या कडे वन प्रेमी व ग्रामस्थांचे लक्ष लागले आहे.
जंगल वाचविण्यासाठी परिसरातील नागरिकांसह ग्रामपंचायतींनी देखील प्रयत्न केला पाहिजे .अशीच वृक्षतोड सुरू राहिली तर फक्त जमीन शिल्लक राहिल पण एकही झाड दिसून येणार नाही .या पुढे वन अतिक्रम करणाऱ्या कोणत्याही व्यक्तीस ग्रामपंचायत ने नाहरकत दाखला देऊ नये.आपापल्या हद्दीत कोणास वृक्षतोड करू न देता वन संवर्धन केले पाहिजे.
राहुल ईशी,अध्यक्ष,
सातपुडा संवर्धन समिती,शिरपूर
