आटपाडीतील दलित बांधवाना न्याय मिळणेसाठी आंदोलनाचा इशारा
प्रांताधिकारी, तहसीलदार यांना निवेदन देऊन आंदोलनाचा इशारा
आटपाडी प्रतिनिधी
आटपाडीतील धनाजी सॉ मिल च्या धुळीमुळे अनेक नागरिकांचे आरोग्य धोक्यात आल्याने आनंदराव ऐवळे व दत्तात्रय खंदारे यांनी प्रांताधिकारी ,तहसीलदार, यांना लेखी तक्रार देऊन आंदोलनाचा इशारा दिला आहे .
स्वातंत्र्याच्या अमृत महोत्सवी वर्षाच्या पदार्पणात दलित बांधवांना न्याय मिळण्यासाठी तहसील समोर धनाजी सॉ मिल व वनक्षेत्रपाल खाडे यांच्या मनमानी कारभाराविरोधात धरणे आंदोलन करणार असल्याचे म्हटले आहे.
आटपाडी येथील कायमचे रहिवासी असून (ऐवळे गल्ली) धनाजी सॉ मिल संदर्भात व उपवनरक्षक सांगली व वनक्षेत्रपाल आटपाडी यांना वेळोवेळी निवेदने देऊनही दखल घेतली जात नाही.
सदरची धनाजी सॉ मिल आटपाडी शहरामध्ये दाट लोकसंख्येच्या दलित वस्ती मध्ये (ऐवळे गल्ली) आहे. या मिलमुळे गेली अनेक वर्षापासून तेथे राहत असलेल्या लोकांना मोठ्या प्रमाणात त्रास होत आहे. या धनाजी सॉ मिलचा कर्कश आवाज त्याच बरोबर मिलच्या कामामुळे लाकडी भुशाची धूळ तयार होऊन राहत असलेल्या लोकांच्या घरांमध्ये येत असते. या भुशामुळे अनेक लहान मुलांना वयोवृद्ध लोकांना श्वासनाचा त्रास होत आहे.
सदरची धनाजी सॉ मिल या वस्तीमध्ये असलेल्या मुळे मिलच्या आसपास अनेक घरे आहेत.मिलमध्ये येणाऱ्या मोठ मोठी लाकडामुळे त्याच्या चढउतारामुळे घरे हादरून अनेक घरांना भेगा पडल्या आहेत. त्याचबरोबर अनेक घरांच्या भिंतींना तडे गेलेले आहेत. या ठिकाणी असलेली घरे धाब्याची आहेत. सदरची घरे ही माती दगडांनी बांधीव असल्याने या भिंती मिलमुळे कायमस्वरूपी ओल्या राहत आहेत. त्यामुळे या भिंतींचे फुगवटे तयार झाले आहेत. त्यामुळे त्या ठिकाणी असलेले घरे पडण्याचा धोका निर्माण झाला आहे. त्यामुळे आमच्या आरोग्याचा व जीवन मरणाचा प्रश्न निर्माण झालेला आहे.
सदर मिलच्या विरोधात अनेक वेळा निवेदने दिलेले आहेत. सदरची मिल ही मानवी वस्तीमध्ये असल्याने त्या ठिकाणी राहत असलेल्या लोकांच्या आरोग्याचा प्रश्न निर्माण होऊ शकतो असा प्रदूषण मंडळाचा अहवाल असतानाही सदर मिलचे मालक आपले राजकीय बळ व अधिकार्यावरती दबावतंत्र व आर्थिक व्यवहाराच्या माध्यमांमुळे या मिलवरती कायमस्वरूपी कारवाई होत नाही.
त्याचबरोबर आटपाडी वनक्षेत्रपाल श्री.खाडे यांच्याकडे या विषयासंबंधी माहिती देण्यासाठी गेलो असता त्यांच्याकडून उद्धटपणाचे वर्तन होत असते. त्यामुळे अशा भ्रष्ट अधिकाऱ्यावरती कारवाई होऊन सदरची मिल कायमस्वरूपी त्या ठिकाणीहून हलविण्यात यावी व तेथे राहत असलेल्या लोकांना यामुळे होणाऱ्या त्रासापासून न्याय देण्यात यावा. जर मिल बंद नाही झाली तर आम्ही आंदोलन करणार आहोत असेही निवेदनात म्हटले आहे.
फोटो – तहसील कार्यालयात टपाल विभागात निवेदन देताना दलित बांधव
