जवखेडा – अंतुर्ली रस्त्यावरील नाल्यावर नवीन पूल होणेबाबत
त-हाडी
जवखेडा अंतुर्ली रस्त्यावर एकच नाला दोन वेळा या रस्त्यातून जातो. जवखेडा गावाच्या पुढे गेल्यावर याच नाल्यावर एक मोठा पूल बांधून देण्यात आला आहे. नवी अंतुर्ली गावानंतर जुन्या अंतुर्लीकडे जाताना हाच नाला पुन्हा या रस्त्याला क्रॉस होतो. तेथे तळफरशी बांधलेली आहे. मागच्या वर्षाच्या पावसाळ्यातच ही फरशी तुटून गेली होती. या वर्षाच्या पावसाच्या पाण्यामुळे तर तुटलेली फरशी अर्ध्या रस्त्यापर्यंत पोकळ झालेली आहे.
दोन दिवसांपूर्वी याच फरशीवर एक गाडी आणि दोन मोटारसायकली समोरासमोर आल्याने व पुरेशी जागा नसल्यामुळे यांच्यात टक्कर झाली. यात दोनही मोटरसायकलवरील चारही व्यक्ती जखमी झालेत. या तळफरशीवर मोठा पूल बांधण्यात यावा यासाठी तालुक्याचे आमदार काशीरामदादा पावरा व आमदार माननीय अमरीशभाई पटेल यांच्याकडे तसेच जि. प. अध्यक्षांकडे गेल्या दोन वर्षापासून अशी मागणी करण्यात येत आहे. निवेदने, विनंती व तक्रारी केल्यावरही गत दोन वर्षांत माननीय दोनही आमदार साहेब व माननीय जि.प. अध्यक्ष साहेब यांच्याकडून कोणतीही कार्यवाही केली गेली नाही.
जवखेडा – अंतुर्ली रस्त्यावरील हा नाला जळोद धरणाचा मुख्य नाला आहे. धरण भरल्यानंतर या नाल्याला यावर्षी मोठमोठे पूर आले. या फरशीवर पंधरा ते वीस फूट पाणी आल्याचे गावकऱ्यांचे म्हणणे आहे. यामुळे जुनी अंतुर्ली ते नवी अंतुर्ली, जवखेडा तसेच शिरपूरकडे जाणारी वाहतूक बंद होते. सदर तुटलेल्या फरशीवर दुर्दैवी घटना घडण्याअगोदर वा कोणाचा मृत्यू होण्याअगोदर या ठिकाणी मोठा पूल बांधण्यात यावा अशी मागणी या निवेदनाद्वारे परिसरातील ग्रामस्थ शेतकरी यांच्यातर्फे विनंतीपूर्वक करीत आहे.
ग्रामस्थ व शेतकरी यांच्या मागणीचा विचार करता लवकरात लवकर निर्णय घ्यावा व तुटलेल्या फरशीवर नव्याने मोठा पूल बांधण्याच्या कामाला सुरुवात करावी. जर कामास विलंब लागला, टाळाटाळ केली गेली तर परिसरातील शेतकरी आणि पंचक्रोशीतील गावकरी हे जवखेडा वरुळ येथे शिरपूर – शहादा हा रस्ता बंद करून आंदोलन करतील. तसेच दुर्दैवाने या तुटलेल्या फरशीवर अपघात होऊन कुणी गंभीर जखमी झाले किंवा दुर्दैवाने कुणाचा मृत्यू झाला तर त्याची सर्व जबाबदारी संबंधितांवर राहील आणि त्यांच्या विरुद्ध तशा प्रकारचा गुन्हाही नोंदवला जाईल. याची सुद्धा संबंधितांनी नोंद घ्यावी. ही नम्र विनंती.
द्वारा—
प्रा.पी.एस.अंतुर्लीकर
(माजी उपसभापती – पंचायत समिती शिरपूर)
