चिंचाळेतील बेपत्ता त्या युवकाचा मृत्यू की घातपात ,मृतदेह विहीरीत सापडला
आटपाडी प्रतिनिधी
चिंचाळे ता. आटपाडी येथील शहाजी बबन चव्हाण हा युवक राहत्या घरातून मागील एक आठवड्यापासून बेपत्ता होता. मात्र 25 नोव्हेंबर रोजी त्याच्याच विहिरीमध्ये मृतदेह आढळून आला आहे. सदरचा मृतदेह कमरेला विद्युत मोटर बांधलेल्या अवस्थेत आढळून आल्याने मृत्यू बाबत संशय व्यक्त केला जात आहे.
चिंचाळे गावातील युवक शहाजी बबन चव्हाण वय वर्ष 35 हा युवक अविवाहित होता, त्याचे दुसरे दोन भाऊ गलाई व्यवसाय करतात. गेल्या पाच-सहा दिवसापासून तो बेपत्ता होता .त्याच्या घरातील सर्वच मंडळी त्याचा शोध घेत होते. मात्र तो सापडत नव्हता याबाबतची आटपाडी पोलीस ठाण्यामध्ये तीन दिवसांपूर्वी तक्रारदिलेली होती. घरातील मंडळींचा शोध सुरूच होता, अशातच गायकवाड वस्ती येथील शेतातील विहिरी काठावर मयत युवकाचा चष्मा व खिशातील पैसे वगैरे दिसून आले .त्यावेळी विहिरीमध्ये पाहण्याचा प्रयत्न केला.
मात्र विहिरीचे पाणी खराब असल्यामुळे पाण्यामध्ये काही दिसत नव्हते यावेळी रेस्क्यू टीमला बोलावून त्यांच्या मदतीने मनोज पाखरे व दत्ता पाखरे यांनी पाण्यामध्ये कॅमेरे सोडून पाहिले असता विहिरीमध्ये मृतदेह असल्याचे आढळून आले..
मृतदेह काढण्यासाठी विहिरीतील पाणी पंपाच्या साह्याने कमी केले महेश कुमार मठ व भारती विद्यापीठ रेस्क्यू टीमचे गजानन नरळे यांच्या चार तासाच्या अथक प्रयत्नानंतर तो मृतदेह वर काढण्यास रेस्क्यू टीमला यश आले. सदरचा मृतदेह कमरेला कासऱ्याच्या साह्याने विद्युत मोटर बांधलेली असल्याने हा मृतदेह वर काढताना रेस्क्यू टीमला मोठी मेहनत करावी लागली.
सदर मृतदेह हा कमरेला कासराच्या साह्याने विद्युत मोटर बांधलेल्या अवस्थेमध्ये आढळून आल्याने आत्महत्या की घातपात याबाबत परिसरामध्ये चर्चा होत आहे.
