महावितरण विरोधात तानाजीराव पाटील आक्रमक
तोडलेली कनेक्शन तात्काळ जोडण्यासाठी आंदोलनाचा इशारा
आटपाडी/प्रतिनिधी
वसुलीच्या नावाखाली महावितरणने जी शेतकऱ्यांची डीपी सोडवलेली आहेत ती कनेक्शन तात्काळ जोडा व शेतकऱ्यांना वीज बिलासाठी एक महिन्याची मुदत द्या अन्यथा सर्व शेतकऱ्यांना सोबत घेऊन महावितरणला टाळे ठोकण्याचा इशारा आटपाडी चे माजी जिल्हा परिषद सदस्य पाटील यांनी निवेदनाद्वारे दिला आहे.
निवेदनात म्हटले आहे की आधीच शेतकरी अस्मानी संकटाने अडचणीत आला आहे वेळेवर पाऊस नाही त्यामुळे पिके वाया गेली आहेत व त्यात भर म्हणून कोरोनामुळे गेली दोन वर्षे आर्थिक घडी बिघडली आहे त्यामुळे अडचणीत आलेल्या शेतकऱ्याचा पाय अजून खोलात गेला आहे. अशी भीषण परिस्थिती असताना व पिके हातातोंडाशी आले असताना महावितरण वसुली च्या नावाखाली शेतकऱ्यांची डीपी सोडवले आहेत व शेतकऱ्यांचे वीज कनेक्शन कट केले आहेत त्यामुळे हाताला आलेली पिके वाया जाण्याची भीती निर्माण झाली आहे त्यामुळे महावितरण कंपनीने तात्काळ विनाअट कट केलेल्या शेतकऱ्यांचे कनेक्शन जोडावे व वीज पुरवठा पूर्ववत करावा तसेच शेतकऱ्यांना बिले वाटप करून बिल भरण्यासाठी एक महिन्याची मुदत द्यावी व शेतकऱ्यांना मदतीचा हात द्यावा न्यथा शेतकर्‍यांना सोबत घेऊन महावितरणला टाळे ठोकण्यात येईल व तीव्र आंदोलन छेडण्यात येईल याची दखल प्रशासनाने घ्यावी असा इशारा तानाजीराव पाटील यांनी दिला आहे.
गेल्या दोन-तीन वर्षा पूर्वी आटपाडी तालुक्यात तीव्र दुष्काळी परिस्थिती होती परंतु आमदार अनिल बाबर यांच्या मुळे आटपाडी तालुक्यात टेंभू योजनेचे पाणी आले आहे त्यामुळे शेतकऱ्यांनी देखील मोठ्या प्रमाणात बागायत पिके घेतली आहेत परंतु पिके हाताला येण्याच्या काळातच वीज वितरण ने वसुलीच्या नावाखाली वीज कनेक्शन कट करणे अन्यायकारक आहे त्यामुळे हा अन्याय खपवून घेतला जाणार नाही .तीव्र आंदोलन छेडण्यात येईल असा इशारा तानाजीराव पाटील यांनी दिला आहे
