बेस्टमध्ये ज्येष्ठांसाठी सवलतीचा प्रवास लवकरच सुरू होणार – फेस्कॉम*
*गोरेगाव, मुंबई* बृहन्मुंबई व परिसरातील बेस्ट बसमधून ज्येष्ठ नागरिकांना विनामूल्य किंवा सवलतीच्या दरात प्रवास सुविधा सुरू करण्यासाठी महाराष्ट्र ज्येष्ठ नागरिक महासंघ (फेस्कॉम) मुंबई प्रादेशिक विभागाने महानगरपालिकेच्या समाज विकास नियोजन विभागाकडे प्रस्ताव सादर केला होता.
त्याला प्रतिसाद म्हणून समाज विकास नियोजन विभागाने बेस्टला सवलतीच्या खर्चाची प्रतिपूर्ती करण्यासाठी 1 कोटी रुपयांची तरतूद केली आहे. त्यामुळे लवकरच ज्येष्ठ नागरिकांना बेस्टमध्ये सवलतीच्या दरात प्रवास करता येणार असल्याची माहिती फेस्कॉम मुंबई प्रादेशिक विभागाचे अध्यक्ष सुरेश पोटे यांनी दिली
.विसावा ज्येष्ठ नागरिक संघ, गोरेगाव यांच्या वतीने आयोजित मासिक वाढदिवस कार्यक्रमात ते बोलत होते. यावेळी त्यांनी ज्येष्ठांसाठी आरोग्य शिबिरे, विमा, हॉस्पिटल सुविधा यासाठीही पाठपुरावा सुरू असल्याचे सांगितले. तसेच महाराष्ट्र राज्य परिवहनच्या एसटी बसमध्ये 65 वर्षावरील ज्येष्ठांना 50 टक्के आणि 75 वर्षावरील ज्येष्ठांना 100 टक्के सवलत मिळते. या सवलतीसाठी बहुउपयोगी NCMC कार्डचे फायदेही त्यांनी सांगितले.कार्यक्रमाच्या सुरुवातीला विजय केसरकर व परेश कोलले यांनी भावगीत आणि भक्तिगीत सादर केले.
उपस्थित 20 ज्येष्ठ नागरिकांचा मान्यवरांच्या हस्ते भेटवस्तू देऊन सन्मान करण्यात आला. यावेळी व्यासपीठावर फेस्कॉम मुंबई अध्यक्ष सुरेश पोटे, मुंबई ज्येष्ठ नागरिक संघ सदस्य दिलीप धारकर, संकल्प ज्येष्ठ नागरिक संघ उपाध्यक्ष शांताराम खामकर, विसावा संघ अध्यक्ष हिंदुराव वाडते, सोनू वारंग, बाळकृष्ण हळदणकर व पत्रकार बाळ पंडित उपस्थित होते. कार्यक्रमाचे सूत्रसंचालन मंगेश पाटनाईक यांनी केले. तर हिंदुराव वाडते यांनी आभार मानले. कार्यक्रम यशस्वी करण्यासाठी रमेश शेलार, रोहिदास बुद्धिवंत, आप्पासाहेब पाटील, शैलजा बोन्द्रे व बबन बोले यांनी परिश्रम घेतले.
