क्रांतीकारी महापुरुषांमुळे आज महिलांना स्वातंत्र्य
आहे असे मत वंचित बहुजन आघाडीच्या प्रदेश सदस्य डॉ. क्रांतीताई सावंत मांडले. हिवतड (ता.आटपाडी) येथे आयोजित स्री मुक्ती परिषदेत त्या बोलत होत्या. वर्षीचे ज्येष्ठ नेते अरुण वाघमारे, जिल्हाध्यक्ष राजेश गायगवाळे, आटपाडी तालुकाध्यक्ष साहेबराव चंदनशिवे, प्रा.दत्ता हेगडे, महिला आघाडीच्या अध्यक्षा राखीताई खरात, प्रमुख उपस्थित होते.
यावेळी बोलताना जिल्हाध्यक्ष म्हणाले प्रस्थापित पक्षांमध्ये महिलांची घुसमट होत आहे. वंचित बहुजन आघाडी मध्ये महिलांनी आपले राजकीय भविष्य घडवावे. कार्यक्रमाचे अध्यक्ष अरुणभाऊ वाघमारे म्हणाले महात्मा फुलेंनी आपल्या घरातून स्त्रियांच्या हक्कासाठी सुरुवात केली. सावित्रीबाई फुले यांना संपूर्ण स्वातंत्र्य दिले. सामाजिक परिवर्तनाची सुरुवात त्यांनी आपल्या घरातून केली. त्यांच्यामुळेच आज महिला शिक्षण घेत आहेत असेही ते म्हणाले.
डॉ.सावंत म्हणाल्या महिलांनी सामाजिक बांधिलकीतून राजकीय क्षेत्रात यावे. तसेच आपल्या राजकीय आरक्षणासाठी जागृत रहावे. बालविवाह, चूल आणि मूल ही व्यवस्था होती. सतीप्रथा, केशवपन मनुस्मृतीमधे होते. ही असमानता, वर्णव्यवस्था नाकारली आणि डॉ.बाबासाहेब आंबेडकरांनी २५ डिसेंबर १९२७ रोजी मनुस्मृतीचे दहन केले. स्रियांनी जागरूक राहिले पाहिजे. विचारांचे स्वातंत्र्य मिळाले पाहिजे. कुटुंबातील सर्व कामांची जबाबदारी महिला बजावतात. राखीव जागा ह्या दिखाव्यासाठी नाहीत. महिलांनी स्वतः राजकिय निर्णय घ्यावेत. कायद्याने महिलांना ५०% अधिकार मिळाले असूनही राजकारणात महिलांवर पुरुषांकडून दबाव आणला जातो. महिलांचे आर्थिक सक्षमकरण झाले पाहिजे. हिंदू कोड बिलासाठी बाबासाहेबांनी कायदेमंत्री पदाचा राजीनामा दिला होता. भारतीय संविधानामुळे जमीन आणि संपत्तीत महिलांना पुरुषांच्या बरोबरीने समान वाटा मिळाला.
यावेळी हिवतड गावच्या सरपंच रूपाली सरगर,नवनाथ जावीर, दयानंद अहिवळे, ग्रा.पं.सदस्य पिंटू पवार, गोमेवाडीच्या उपसरपंच रेशमा सोहनी, शिवाजी खैरमोडे, रोहन भिसे, चंद्रकांत पवार यांच्यासह बहुसंख्य महिला उपस्थित होत्या. सूत्रसंचालन विनोद पवार यांनी केले. आभार आशिष पवार यांनी मांडले.
