रविंद्र शेंडगे यांना राज्यस्तरीय राजमाता जिजाऊ पुरस्कार जाहीर..
सामाजिक क्षेत्रातील उल्लेखनीय कार्याबद्दल गौरव.
अंधश्रद्धा निर्मूलन व वैज्ञानिक दृष्टिकोन समिती महाराष्ट्र राज्य यांच्या वतीने दिला जाणारा यंदाचा राज्यस्तरीय राजमाता जिजाऊ पुरस्कार
पेड ता. तासगाव जि. सांगली येथील महाराणीदेवी अहिल्याबाई होळकर शिक्षण संस्था सांगलीचे संचालक,रविंद्र शेंडगे यांना सामाजिक कार्यात उल्लेखनीय कामगिरी केल्याबद्दल जाहीर झाल्याचे समितीचे कार्याध्यक्ष तानाजी शिंदे यांनी पत्राद्वारे कळविले आहे..
याबद्दल सर्व स्तरातुन रविंद्र शेंडगे यांचे अभिनंदन होत आहे.
राज्यातील काही मोजक्या लोकांना या पुरस्काराने दरवर्षी सन्मानित करण्यात येते. येत्या 20 मार्च रोजी मालेगाव शहरांत भव्य कार्यक्रमात प्रमुख मान्यवरांच्या शुभहस्ते या पुरस्काराचे वितरण होणार आहे. सदर कार्यक्रमाला मा.ना.श्री.दादाजी भुसे,मंत्री कृषी व माजी सैनिक कल्याण, महाराष्ट्र राज्य व मा.श्री.डॉ.सुभाष भामरे केंद्रीय संरक्षण राज्य मंत्री हे मान्यवर उपस्थित राहणार आहेत.
हे पुरस्कार देऊन सन्मानित केल्याने समाजात अशा प्रकारचे अनेक कामे करणाऱ्या सेवाभावी व्यक्तींचे मनोबल वाढते व काम करण्यास प्रेरणा व प्रोत्साहन मिळते या उदात्त हेतूने समितीने हा राज्यस्तरीय पुरस्कार रविंद्र शेंडगे यांना जाहीर केला असल्याचे समितीने पाठवलेल्या पत्राद्वारे समजले आहे.
रविंद्र शेंडगे हे महाराष्ट्रातील धनगर समाजाचे पहिले आमदार व अहिल्याबाई होळकर शिक्षण संस्थेचे संस्थापक कै.बॅरिस्टर टी.के. शेंडगे यांचे पुतणे आहेत. कै.बॅरिस्टर टी.के शेंडगे व त्यांचे मोठे बंधू कै.उत्तमराव शेंडगे यांच्यापासून त्यांनी सामाजिक कार्याची प्रेरणा घेतली आहे. ग्रामीण भागातील विद्यार्थ्यांना शिक्षणाच्या प्रवाहात आणण्याचे काम त्यांच्या कुटुंबीयांनी केले आहे. तसेच . निराधारांना आधार देणारे कुटुंब म्हणून त्याचीओळख आहे.
पेड येथील महाराणी देवी अहिल्याबाई होळकर शिक्षण संस्थेचे संचालक म्हणून काम करत असताना त्यांनी व त्यांच्या कुटुंबीयांनी सामाजिक, सांस्कृतिक, शैक्षणिक, क्रीडा क्षेत्रात महत्त्वपूर्ण योगदान दिले आहे.त्यांच्या कुटुंबाने दिलेल्या चौफेर क्षेत्रातील योगदानाबद्दल त्यांचा पुरस्कार देऊन गौरव करण्यात येणार आहे.
रविंद्र शेंडगे यांना हा महत्त्वाचा पुरस्कार जाहीर झाल्याने पेड गावच्या शिरपेचात मानाचा तुरा रोवला गेल्याची भावना पेड व पेड पंचक्रोशीतील ग्रामस्थांकडून व्यक्त केली जात आहे.
