वायरमन समाधान माळी यांचा वाढदिवस धावडवाडी करांनी साजरा केला
माणगंगा न्यूज पोर्टल:-वायरमन म्हटले कि समोर ऊभा राहतो खाकी ड्रेस, कमरेला पक्कड,खिशाला टेस्टर, पायात रबरी बुट अन् हातात रबरी मोजे. रात्री पाऊस पडला वारे सुटले कि लाईट जाते.
लाईट गेल्यानंतर लगेच तोंडात शिवी येते ती वायरमलाच.. परंतु या कठीण प्रसंगी वायरमन ऊन, वारा, पाऊस कशाचीही तमा न करता, आपल्या जिवाची पर्वा न करता आपण अंधारात न रहावे यासाठी झटत असतात.गावचा गावगाडा चालवत असताना वायरमन पडद्यामागचे कलाकार म्हणून काम करत असतात.
या पडद्यामागच्या कलाकारांना सहसा कोणी विचारत नाही. फक्त बिल वाटणे व वसुली एवढच यांच काम अस आपण समजतो परंतु हेच वायरमन जिवाचे रान करत तुम्ही आम्ही अंधारात न राहो याची सदैव काळजी घेतात. साधारणपणे १९६२ साली आपल्या धावडवाडी गावामध्ये वीज आली.
या अगोदर गावच्या प्रत्येक चौकात कोपऱ्यात एक कंदील कट्टा असायचा. गावाने नेमलेला माणूस हा दिवस मावळायच्या आत काच पुसून तेल भरून कंदील सज्ज करायचा. कालांतराने गॅसबत्ती आली वीज आली…
आता अन्न, वस्त्र निवारा या सोबत शिक्षण व वीज ह्या सुद्धा माणसाच्या मुलभूत गरजा बनल्या आहेत. या अनुषंगाने एक कृतज्ञता म्हणून आज आपल्या गावचे वायरमन समाधान माळी यांचा वाढदिवस साजरा केला.
