माझ्या मतदारसंघातील कोणतीही शाळा शैक्षणिक साहित्यापासून वंचित राहणार नाही
आमदार जयंत आसगावकर यांची ग्वाही
सांगली जिल्ह्यातील 400 शाळांना पहिल्या टप्प्यात प्रिंटर वाटप
माझ्या मतदार संघातील कोणतीही शाळा शैक्षणिक साहित्यापासून वंचित राहणार नाही, अशी ग्वाही आमदार जयंत आसगावकर यांनी दिली.
आटपाडी एज्युकेशन सोसायटी संचलित श्रीमंत बाबासाहेब देशमुख महाविद्यालय येथे आयोजित थ्री-इन-वन प्रिंटर वाटप कार्यक्रमात ते बोलत होते.
आमदार जयंत आसगावकर यांच्या आमदार फंडातून सांगली जिल्ह्यातील 400 शाळांना पहिल्या टप्प्यात प्रिंटर वाटप करण्यात आला.
आमदार जयंत आसगावकर म्हणाले, माझ्या आमदार फंडातून शाळांना शैक्षणिक साहित्य दिले जाईलच, याशिवाय सीएसआर व ज्या सामाजिक संस्था आहेत, त्यांच्याकडून देखील शाळांना शैक्षणिक देण्यासाठी माझा प्रयत्न राहील. ज्या शाळांना पहिल्या टप्प्यात प्रिंटर मिळालेला नाही, त्यांना दुसऱ्या टप्प्यात तो दिला जाईल.
सरकार कोणाचेही असो, शिक्षक आमदार म्हणून शिक्षकांचे प्रश्न सोडवण्यासाठी मी नेहमीच प्रयत्नशील राहीन. मला निवडून आणण्यामध्ये तुमचे महत्त्वाचे योगदान आहे, ते मी कदापिही विसरणार नाही, असेही आमदार जयंत आगावकर म्हणाले.
यावेळी संस्थेचे सचिव एच. यु. पवार, प्राचार्य डॉ. विजय लोंढे, मॉर्डन एज्युकेशन सोसायटीचे चेअरमन अजित चव्हाण, आटपाडी तालुका काँग्रेसचे अध्यक्ष डी. एम. पाटील, मुख्याध्यापक संघ आटपाडीचे अध्यक्ष शिवाजी चव्हाण, खानापूर विधानसभा काँग्रेसचे अध्यक्ष मोहन खरात, राष्ट्रवादी महिला आघाडीच्या अध्यक्षा अनिता पाटील, मुख्याध्यापक माळी सर, डॉ. अंकुश कोळेकर, युवक राष्ट्रवादी काँग्रेसचे तालुकाध्यक्ष सुरेश पाटील, आशा देशमुख यांच्यासह मुख्याध्यापक, शिक्षक शिक्षकेतर कर्मचारी बंधू-भगिनी उपस्थित होते.
